Велес, 18.декември 2025 (МИА) – Државното средно училиште Регионален центар за стручно образование  „Коле Неделковски“ од Велес  денеска со свеченост го заокружи одбележувањето на јубилејот 60 години успешна работа.

На настанот беа доделени награди и признанија на поранешни професори и  ученици првенци и наградите по распишаниот литературен и ликовен конкурс за основци и средношколци.

„Коле Неделковски“ е водечко државно средно стручно  училиште за Повардарието, во кое се школуваат 980 ученици од Велес и поширокиот регион, во  четири струки: машинска, електротехничка,  угостителско-туристичка и сообраќајна.

Со поддрпша од МОН, во училиштетсо веќе неколку години се отворени дуални паралелки во кои учениците имаат практична обука во велешки фирми со можност таму и да се вработат.

Како што информираше  за МИА Горан Богоевски, директор на училиштето, тоа постои уште пред неговата верификација како  вечерно занаетчиско училиште, а после војната, во 1950 година, училиштето прераснува во УЗУС - училиште за ученици во стопанството - се до 1965 година кога со одлука на тогашното собрание на Општина Титов Велес прераснува во Средно стручно општинско училиште. Како занаетчиско училиште било на друга локација -  во простории на сегашното ООУ „Свети Кирил и Методиј“ во Велес.

Училиштето било наменето за  остручување  ученици кои потоа  ќе работат во стопанството, особено во тогаш развиената  метална, керамичка и текстилна струка во Велес. Денес „Коле Неделковски“  прерасна во Државно средно училиште Регионален центар за стучно образование и обука.

По повод  јубилејот, сегашни ученици  снимија и документарен филм „60 години техничко образование - патоказ кон знаењето“ во кој е прикажан развојот на училиштето, како и сведоштва на негови професори и ученици, меѓу кои се и актуелниот градоначалник Марко Колев, пратеникот Игор Здравковски, бизнисменот Златко Љутков и македонскиот репрезентативец - фудбалерот Панче Ќумбев.

Во рамките на прославата за јубилејот, се одржаа многу едукативни работилници, спортски, ликовни и литературни натпревари за основци и средношколци и  најдобрите ученици на конкурсите денеска ги добија наградите. ад/хс/ 

Фото: МИА