Скопје, 10 декември 2025 (МИА) -  Кога системот е дигитализиран процесите ќе бидат транспарентни, одлуките ќе станат предвидливи, а услугите достапни до сите. Дигитализицијата го зајакнува владеењето на правото, го стеснува просторот за корупција и обезбедува транспарентни и унифицирани услуги достапни до сите граѓани. Тоа е најмоќниот инструмент што ќе ни помогне да изградиме доверба во институциите и да обликуваме квалитетно општество.

Ова се пораките со кои денеска стартуваше третата годишна конференција за дигитализација на Американската Стопанска Комора (АмЧам) во Скопје. 

Славе Пројковски, член на одборот на директори на АмЧам истакна дека дигитализацијата бара фокус на луѓето и нивните вештини и оти е потребна заедничка работа на јавниот и приватниот сектор.  За исполнување на поставените цели неопходно е јакнење на рамката за сајбер бездност, што, посочи, е национална потреба затоа што секој нов систем, секој нов процес, секое ново поврзување мора да биде безбедно. 

- Дигитализицијата на државните сервиси мора да се одвива во соработка со приватниот сектор. Прогресот зависи од една работа-работење  заедно. Ни треба силно партнерство. Владата да го притиска приватниот сектор за иновации, а приватниот сектор да ја притиска Владата за модернизирање. Кога двете страни ќе ги здружат силите прогресот ќе биде побрз и одржлив. Луѓето се во центарот на трансформацијата. Мора да инвестираме во дигитални вештини на секое ниво, да им помогнеме на институциите да  креираат и да понудат нови системи, на компаниите да ги дигитализираат нивните процеси, а граѓаните да се чувствуваат безбедно кога ги користат, рече Пројковски.

Во тек е панел на тема „Дигитална трансформација на јавниот сектор“, со фокус на е-фактура и фискализација во реално време“ со учество на директорката на Управата за јавни приходи.

Предвидени се и панели за „Од интероперабилност до институционална отпорност, за искористување на потенцијалот на поврзаните податоци“, „Дигитализација и сајбер безбедност во енергетскиот сектор“, „Забрзување на дигиталната трансформација во финансискиот сектор“ и „Финансирање на дигитализацијата“. лв/паг/

Фото: Принтскрин