Леверкузен, 12 декември 2025 (МИА) - Фудбалерот на Баер Леверкузен, Флоријан Вирц ќе го продолжи договорот со клубот, дознава германскиот весник „Билд“.

Вирц веќе извесно време е во преговори со Баер за продолжување на соработката.

Актуелниот договор го обврзува офанзивниот играч за врска и шампионот во Бундеслигата да соработуваат до летото 2027 година, а според новиот договор тој ќе биде продолжен на уште 12 месеци.

Вирц ќе добие и значително покачување - ќе заработува над 10 милиони евра годишно наместо досегашните осум милиони.

Во договорот на германскиот репрезентативец ќе има и откупна клаузула вредна 125 милиони, која ќе важи од летото 2026 година.

Неколку многу богати клубови изразија интерес за 21-годишниот фудбалер. Манчестер Сити е водечки, бидејќи, Кевин Де Бруин ќе го напушти „Етихад“ кога ќе му истече договорот на лето. „Граѓаните“ го гледаат како негов природен наследник.

Вирц е најважниот играч на Баер оваа сезона. Тој е главен креатор на играта во редовите на германскиот шампион, а веќе има постигнато 15 гола и забележа 12 асистенции во сите натпреварувања.

Баер Леверкузен е на второто место на табелата во Бундеслигата со 46 бодови, додека Баерн е лидер со 54. Следниот натпревар избраниците на Чаби Алонсо го играат против Баерн Минхен на домашен терен - тој натпревар е закажан за в сабота од 18 часот и 30 минути. дс

Фото: Архива