Барселона, 31 јануари 2025 (МИА) - Барселона продолжува со потпишување на нови договори со клучните играчи, откако денеска го стори тоа и со Гави.

Играчот од средниот ред го продолжува актуелниот договор за четири сезони - до летото 2030 година.

Истото беше направено и со Педри вчера, а според пишувањата на медиумите, се задржува вредноста на нивните откупни клаузули - по една милијарда евра.

„Таму каде што му е местото“, напишаа Каталонците за договорот на Гави.

За разлика од Педри, Гави е дете на Барса, а во клубот е од својата 10-та година.

Играчот од средниот ред сега има 20 години и има 131 натпревар за сениорската екипа, на кои постигна 9 голови и 17 асистенции. Со тимот на Блауграна има освоено една титула во Ла Лига и два шпански Суперкупа.

За негова несреќа, Гави го пропушти ЕП 2024 бидејќи се опоравуваше од тешката повреда.

Инаку, Барса ги обнови договорите и со капитенот Роналд Араухо и младиот дефанзивец Жерар Мартин. Ова ќе се случи и со Иниго Мартинез и Ламин Јамал.

Сепак, за Јамал тоа ќе се случи едвај на лето, кога ќе наполни 18 години. дс

Фото: Архива