Mineapolis, 9 janar 2026 (MIA)- Byroja Federale e Hetimeve (FBI) e Shteteve të Bashkuara të Amerikës ka marrë përsipër çështjen e të shtënave fatale ndaj një gruaje nga një oficer i Shërbimit të Imigracionit dhe Doganave (ICE) në Mineapolis, mes tensioneve në rritje për incidentin në të gjithë shtetin.

Mbikëqyrësi i Byrosë së Kapjes Penale (BCA) të Minesotës, Dreu Evans, tha në një deklaratë se BCA nuk do të përfshihej më në hetimin për vrasjen e Rene Nikol Gud, 37 vjeç, nënë e tre fëmijëve, e cila u qëllua për vdekje nga një agjent federal në veturën e saj të mërkurën.

“Hetimi tani do të drejtohet vetëm nga FBI dhe BCA nuk do të kishte më qasje në materialet e çështjes, provat e vendit të ngjarjes ose intervistat hetimore të nevojshme për të përfunduar një hetim të plotë dhe të pavarur”, tha Evans, transmeton Telegrafi.

Ai shtoi se, ndërsa më parë ishte rënë dakord që BCA do të hetonte të shtënat, zyra e prokurorit të SHBA-së e ndryshoi këtë.

 Keit Elison, prokurori i përgjithshëm demokrat i Minesotës, tha se vendimi i FBI-së ishte “thellësisht shqetësues”.

Sipas Elisonit, autoritetet shtetërore mund të hetojnë me ose pa bashkëpunimin e qeverisë federale, duke shtuar se me provat që ai ka parë deri më tani, të cilat jo të gjitha janë bërë publike, akuzat shtetërore ishin një mundësi.

Zyrtarët shtetërorë dhe federalë kanë ofruar versione krejtësisht të ndryshme të të shtënave, në të cilat një agjent i paidentifikuar i ICE-së qëlloi Gudin, një qytetare amerikane, në një lagje banimi.

Agjenti i ICE-së që qëlloi Gudin ishte midis 2,000 oficerëve federalë që administrata e presidentit Donald Tramp kishte njoftuar se po i vendoste në zonën e Mineapolisit në atë që Departamenti i Sigurisë Kombëtare i SHBA-së e përshkroi si “operacioni më i madh i DHS-së ndonjëherë”.

Zyrtarët e DHS-së, përfshirë sekretaren e agjencisë Kristi Noem, i mbrojtën të shtënat si vetëmbrojtje dhe e akuzuan gruan se po përpiqej të sulmonte agjentët në një akt “terrorizmi të brendshëm”.

Pas vrasjes së Gudit, protestuesit dolën në rrugë në Mineapolis për të dënuar veprimet e agjentit të ICE dhe praninë më të gjerë të ICE në qytet, e cila është pritur me demonstrata të shpeshta.

Protesta janë zhvilluar dhe janë planifikuar në Nju Jork Siti, Sietll, Detroit, Uashington, Los Anxhelos, San Antonio, Nju Orllans dhe Çikago.

Foto: printskrin nga Jutjub