Najpido, 6 dhjetor 2025 (MIA) - Të paktën 20 persona humbën jetën dhe 30 të tjerë janë plagosur në një sulm ajror ndaj një çajtoreje në Tabain, në veriperëndim të Mianmarit, deklaruan sot autoritetet lokale për DPA-në.

 Ata thanë se junta ushtarake në pushtet kreu sulmin mbrëmë. Një fëmijë pesëvjeçar është viktima më e re, dhe më i vjetri është 77 vjeç, me numrin e të vdekurve që pritet të rritet.

 Dhjetëra vizitorë ishin mbledhur në çajtore për të parë  një reprizë të një ndeshjeje të ekipit kombëtar të futbollit të grave.

 Sipas dëshmitarëve, dy bomba u hodhën direkt mbi objektin. Junta ende nuk ka komentuar për sulmin.

 Mianmari është zhytur në dhunë dhe kaos që nga një grusht shteti ushtarak në shkurt të vitit 2021 që përmbysi qeverinë e zgjedhur në mënyrë demokratike të Aung San Su Çi, fituese e Çmimit Nobel për Paqen në vitin 1991.

 Junta kryen rregullisht sulme ajrore ndaj grupeve rebele, ku shpesh goditën civilë.

 Foto: Arkiiv i MIA-s