Uashington, 31 mars 2025 (MIA) - Presidenti i SHBA-së, Donald Tramp mbrëmë e paralajmëroi presidentin ukrainas Volodimir Zelenski që të mos e refuzojë marrëveshjen për minerale të rralla sepse mund të jetë "në telashe të mëdha".

"Unë shoh që ai (Zelenski) po përpiqet të tërhiqet nga marrëveshja e burimeve minerale. Dhe nëse e bën, ai do të jetë në telashe. Do të ketë probleme të mëdha, të mëdha", theksoi Tramp.

Ai po i bën presion Zelenskit që të nënshkruajë një marrëveshje që lejon kompanitë amerikane të minojnë mineralet e Ukrainës, ndërsa marrëveshje armëpushimi po negociohet edhe midis Ukrainës dhe Rusisë.

"Kemi rënë dakord për këtë, ndërsa tani ai (Zelenski) thotë se dëshiron të rinegociojë. Ai dëshiron që Ukraina të bëhet anëtare e NATO-s. Pra, ai nuk do të jetë kurrë anëtar i Aleancës dhe këtë e kupton. Kjo është arsyeja pse ai tani po kërkon rinegocim", tha Tramp.

Zelenski deklaroi më 28 mars, pas marrjes së projekt-marrëveshjes së re amerikane, për të cilën tha se ishte "zgjeruar në mënyrë dramatike", se Kievi nuk do të pranonte asnjë marrëveshje për mineralet e rralla të tokës që do të rrezikonte integrimin në Bashkimin Evropian.

Propozimi i fundit i SHBA-së kërkon që Kievi t'i dërgojë Uashingtonit të gjitha të ardhurat nga një fond i përbashkët investimi, i cili do të kontrollonte burimet e Ukrainës, derisa Ukraina të kthejë ndihmat ushtarake amerikane me interes. Sipas draftit të fundit, Ukraina nuk do të ketë garanci sigurie dhe kërkohet të kontribuojë në fond me të ardhura nga burimet natyrore të menaxhuara nga kompanitë shtetërore dhe private.

Projektmarrëveshja parashikon që Uashingtoni do të ketë përparësi në blerjen e burimeve dhe kthimin e të gjitha parave të dërguara në Ukrainë nga viti 2022, me një normë vjetore interesi prej katër për qind, përpara se Ukraina të fitojë akses në të ardhurat e fondit.

Fondi i përbashkët i investimeve do të menaxhohej nga Korporata amerikane për zhvillim bdërkombëtar dhe fondi do të kishte pesë anëtarë të bordit, tre prej të cilëve do të emëroheshin nga SHBA-ja dhe dy nga Ukraina. Fondet do të shkëmbeheshin me valutë të huaj dhe do të dërgoheshin jashtë vendit. mb/

Foto: EPA