Shkup, 20 nëntor 2025 (MIA) - Kryetari i Komisionit për Politikë të Jashtme dhe Tregti të Jashtme, Musa Xhaferi, realizoi takim me ambasadorin e Kazakistanit, Satibaldi Burshakov. Siç informojnë nga shërbimi për informim i Kuvendit, të dy bashkëbiseduesit shprehën kënaqësinë për takimin e parë të ndërsjellë në vitin që shënon 30-vjetorin e vendosjes së marrëdhënieve diplomatike me Kazakistanin dhe hapjen e sivjetme të Ambasadës së Republikës së Kazakistanit në Shkup.

Ambasadori Burshakov informoi për jetën politike dhe shoqërore në Kazakistan, për burimet e mëdha që kanë në dispozicion dhe për shkëmbimin tregtar me vendet fqinje, por edhe me vendet e tjera, përfshirë Bashkimin Evropian. Në këtë kontekst, ata diskutuan ide dhe iniciativa konkrete që synojnë rritjen e bashkëpunimit ekonomik me vendin tonë në fushat me interes dypalësh.

Një fokus i rëndësishëm i mëtejshëm u theksua në futjen e regjimit pa viza sa më shpejt të jetë e mundur, me qëllim të lehtësimit të udhëtimit për qytetarët, zhvillimin e turizmit dhe afrimin e popujve.

U propozua gjithashtu forcimi i marrëdhënieve parlamentare përmes vizitave dypalëshe të Komisioneve për Punë të Jashtme dhe Tregti, si dhe Grupeve Parlamentare të Bashkëpunimit, gjë që u pranua unanimisht nga të dyja palët. fc/

Foto: Kuvend