Riad, 24 mars 2026 (MIA) - Arabia Saudite dhe Emiratet e Bashkuara Arabe (EBA) po i afrohen angazhimit aktiv në luftën kundër Iranit, raportojnë mediat amerikane, ndërsa konflikti në Lindjen e Mesme kërcënon gjithnjë e më shumë ekonomitë e tyre.

Sipas "Uolstrit xhurnal", duke cituar burime, dy shtetet e Gjirit po lëvizin gradualisht drejt një roli më aktiv pasi Riadi lejoi forcat amerikane të përdorin një bazë ajrore në territorin e tij. Një burim i njohur me vendimin i tha mediumit se ishte "vetëm çështje kohe" para se Arabia Saudite të hyjë në luftë, duke kujtuar deklaratën e ministrit të jashtëm saudit javën e kaluar se durimi i Mbretërisë me sulmet iraniane "nuk është i pakufizuar".

Në prag të konfliktit, Riadi u përpoq të qëndronte larg përshkallëzimit dhe refuzoi të lejonte përdorimin e hapësirës së tij ajrore për operacionet amerikane, por Irani megjithatë lëshoi ​​raketa drejt Mbretërisë.

Pasi filloi lufta më 28 shkurt, kur Izraeli dhe SHBA nisën një sulm ndaj Iranit, Teherani mori hak jo vetëm kundër tyre, por edhe kundër gjashtë anëtarëve të Këshillit të Bashkëpunimit të Gjirit (GCC) - Bahreinit, Kuvajtit, Omanit, Katarit, Arabisë Saudite dhe Emirateve të Bashkuara Arabe. Sulmet e përsëritura kanë shkaktuar viktima dhe kanë ndërprerë rëndë prodhimin e naftës dhe gazit, si dhe turizmin - shtyllat kryesore ekonomike për rajonin.

Irani ka vendosur gjithashtu një bllokadë de fakto të Ngushticës së Hormuzit, nëpër të cilën normalisht kalon rreth 20 përqind e naftës dhe gazit botëror, duke çuar në një rritje të ndjeshme të çmimeve të naftës së papërpunuar.

Pavarësisht kundërshtimit fillestar ndaj përdorimit të forcës, shtetet e Gjirit tani po ushtrojnë presion mbi SHBA-në që të vazhdojnë sulmet, me qëllim që Irani të dalë nga lufta me një aftësi ushtarake të dobësuar ndjeshëm dhe jo më në gjendje të paraqesë një kërcënim, thanë katër zyrtarë të lartë nga rajoni për "Tajms of Izrael në kushte anonimiteti.

Megjithatë, këto vende nuk kanë kryer ende sulme të drejtpërdrejta sepse udhëheqësit e tyre kanë frikë nga një përshkallëzim më i gjerë dhe i pakontrolluar. Edhe pse ndajnë një pakënaqësi të përbashkët me Iranin, shtetet e Gjirit janë gjithashtu të pakënaqura me faktin se nuk mund të ndikojnë ndjeshëm në politikat e administratës së Donald Trampit, pavarësisht investimeve të mëdha në marrëdhëniet me Uashingtonin.

Sipas raportit, ata e gjykuan gabim se kishin arritur të bindnin SHBA-në të parandalonin sulmet ndaj infrastrukturës energjetike iraniane, pas sulmit izraelit ndaj objekteve të magazinimit të karburantit në Teheran. Javën e kaluar, Izraeli kreu një sulm të ri në fushën e gazit "Saut Pars", i cili u pasua nga sulme hakmarrëse iraniane ndaj objekteve kryesore të energjisë në shtetet e Gjirit.

Trampi tha se nuk ishte informuar paraprakisht për sulmin ndaj "Saut Pars", ndërsa zyrtarët izraelitë pretendojnë se veprimi ishte i koordinuar me SHBA-në.

Megjithatë, kryeministri izraelit Benjamin Netanjahu deklaroi se Izraeli "veproi në mënyrë të pavarur". Autoritetet izraelite deklarojnë se qëllimi i fushatës ushtarake, e kryer së bashku me SHBA-në, është dobësimi i aftësive ushtarake të regjimit iranian, neutralizimi i kërcënimeve nga programet e tij bërthamore dhe balistike, si dhe mbështetja për grupet e armatosura rajonale, me qëllim krijimin e kushteve për ndryshimin e brendshëm të regjimit në Iran. sa/

foto: arkivi