Shkup, 15 nëntor 2025 (MIA) - Propozim- buxheti për vitin 2026 synon konsolidimin fiskal, me qëllim uljen e deficitit dhe rritjen ekonomike. I projektuar për të mbështetur familjet, për të forcuar mbrojtjen sociale dhe për të investuar në sektorët kyç që ndikojnë drejtpërdrejt në jetën e përditshme të qytetarëve, theksoi deputetja e VMRO-DPMNE-së, Dafina Stojanoska në konferencën e sotme për shtyp.

Mes përfitimeve kryesore për qytetarët, siç theksoi Stojanoska, janë përmirësimi i mbrojtjes sociale dhe pensioneve.

"Mjetet e pensioneve janë rritur për 10.7%, ose 10.3 miliardë denarë më shumë, gjë që mbështet drejtpërdrejt pensionistët në kushte të rritjes së kostove të jetesës. Ndërsa mjetet totale të mbrojtjes sociale janë rritur për 7.8%, duke përfshirë mbështetjen për të papunët, fëmijët dhe grupet e cenueshme”, theksoi ajo.

Theksoi se mbështetja për kujdesin shëndetësor është rritur, apo buxheti i kujdesit shëndetësor është rritur për 1.5%, me 884 milionë denarë shtesë që synojnë përmirësimin e kujdesit shëndetësor publik, pajisjeve mjekësore dhe shërbimeve për pacientët.

Në këtë kontekst të kësaj, shtoi se janë parashikuar edhe investime në infrastrukturën shëndetësore, përkatësisht 316 milionë denarë për rinovimin dhe modernizimin e kujdesit shëndetësor publik.

"Nga ana tjetër, mjetet për arsimin janë rritur për 3.4%, me theks në arsimin e mesëm dhe të lartë, si dhe ndërtimin dhe rinovimin e shkollave dhe konvikteve studentore, sallave sportive dhe efikasitetit energjetik në institucionet arsimore", ka thënë Stojanoska.

Duke folur për zhvillimin ekonomik dhe punësimin, tha se masat aktive të punësimit kanë rritur mbështetjen financiare për 2.5%, që synojnë uljen e papunësisë në Maqedoninë e Veriut. Njëherësh, siç shtoi, fokusi po vihet edhe në mbështetjen e zhvillimit të ndërmarrjeve të vogla dhe të mesme, përmes një duzine programesh.

Stojanoska theksoi se po përmirësohet infrastruktura dhe mjedisi jetësor për të cilat janë ndarë 12.3 miliardë denarë për rrugë, hekurudha dhe transport publik, si dhe fonde për uljen e ndotjes, menaxhimin e mbeturinave dhe mbrojtjen e resurseve ujore.

Lidhur me decentralizimin dhe mbështetjen për qeveritë lokale, Stojanoska theksoi se bllok dotacionet, pra transfertat për qeveritë lokale janë rritur për 6.1%, gjë që u lejon komunave të përmirësojnë shërbimet lokale, infrastrukturën dhe kushtet e jetesës në komunitetet lokale.

Sipas saj, Propozim buxheti i vitit 2026 balancon përgjegjësinë fiskale dhe nevojat e qytetarëve.

"Fokusi mbetet në mbështetjen e zhvillimit ekonomik, drejtësisë sociale, si dhe shumë sektorëve të tjerë që do të kenë një ndikim të fortë pozitiv. E gjithë kjo, drejtpërdrejt ose tërthorazi i drejtohet çdo qytetari. Një dokument financiar që besoj se do të marrë mbështetje të gjerë nga deputetët, sepse paraqet një investim të vërtetë në të ardhmen", theksoi Stojanoska.

Foto: arkivi i MIA-s