Shkup, 22 nëntor 2025 (MIA) - Qeveria sot me seancë solemne e shënoi Ditën e Alfabetit të gjuhës shqipe "22 Nëntori" në të cilën u dërguan mesazhe për rëndësinë e kësaj dite dhe se ky vend është shtëpi e diversitetit që nuk na ndan, por e pasuron tregimin tonë të përbashkët kombëtar.

"Suksesi është projekti ynë i përbashkët. Vetëm nëse jemi të bashkuar në respekt, besim dhe përgjegjësi do të mund të arrijmë rezultate që do ta çojnë atdheun përpara", tha sot kryeministri Hristijan Mickoski,

Kryeministri e uroi Ditën e Alfabetit të gjuhës shqipe, e cila siç tha, bart simbolikë të fortë historike dhe kulturore.

Në Kongresin e vitit 1908, theksoi, inteligjenca shqiptare ndërmori hapin e madh drejt krijimit të një alfabeti të unifikuar, themel i kohezionit gjuhësor dhe kulturor të shqiptarëve. Ky ishte një akt me rëndësi të thellë evropiane, një akt modernizimi, arsimi dhe hapjeje. Në një periudhë kur Ballkani kalonte nëpër sfida të rënda, Kongresi i Manastirit tregoi se forca e një shoqërie buron nga dituria, nga gjuha dhe nga besimi në të ardhmen.

"Kjo ditë është e rëndësishme edhe për shtetin tonë. Maqedonia është një shtëpi e diversitetit, i cili nuk ndan, por e pasuron historinë tonë të përbashkët kombëtare. Komuniteti shqiptar, me kulturën, gjuhën, traditat dhe vlerat e veta, është pjesë thelbësore e shtetit tonë. Sot, kur e shënojmë Ditën e Alfabetit të Guhës Shqipe, u japim mirënjohje përpjekjeve të brezave që luftuan për arsim, shkrim-lexim dhe zhvillim kulturor, por edhe të gjithë atyre që sot e vazhdojnë këtë rrugë", tha Mickoski. 

Atdheu ynë i përbashkët bazohet në idenë se çdo qytetar ka vend të barabartë, vlerë të barabartë dhe mundësi të barabarta.

"Pikërisht për këtë, Qeveria mbetet e përkushtuar ndaj politikave që ndërtojnë besim ndëretnik, krijojnë hapësirë për zhvillim dinjitoz të gjuhëve dhe kulturave dhe e forcojnë kohezionin mes të gjithë qytetarëve tanë. Kemi ambicje dhe dëshirojmë të ndërtojmë një shoqëri në të cilën të rinjtë maqedonas, shqiptarë, turq, serbë, boshnjakë, romë, vlleh dhe të gjithë të tjerët ta shohin të ardhmen e tyre këtu – në një Maqedoni të fortë dhe të zhvilluar. Një shoqëri në të cilën çdo gjuhë është urë, e jo kufi, forcë, e jo ndarje, pasuri, e jo sfidë", theksoi kryeministri.

Në këtë drejtim, theksoi, Qeveria punon aktivisht në projekte që krijojnë një jetë më të mirë për të gjithë qytetarët, pa dallim të përkatësisë së tyre etnike. Jemi të përkushtuar për përmirësimin e infrastructures dhe mundësive në çdo komunë, modernizimin e shkollave, mbështetjen e institucioneve kulturore dhe hapjen e mundësive të reja për të rinjtë. Në vijim janë duke u realizuar programe për digjitalizimin e shërbimeve, për zhvillimin ekonomik të bashkësive lokale dhe për fuqizimin e institucioneve që kujdesen për barazi dhe integrim.

"Qëllimi ynë është që çdo qytetar, në çdo pjesë të vendit, ta ndiejë përparimin dhe ta dijë se shteti qëndron pas tij. Ky nuk është vetëm një obligim politik, por edhe një detyrë morale ndaj gjeneratave të ardhshme", tha Mickoski. 

Edhe zëvendëskryeministrin Arben Fetai theksoi se gjuha është një mjet përfshirjeje, jo përjashtimi, si dhe një urë komunikimi, jo një kufi midis komuniteteve.

"Qeveria jonë synon të sigurojë kushte të barabarta për zhvillimin e të gjitha gjuhëve që përdoren në vend, si pjesë e një vizioni modern të bashkëjetesës", tha Fetai.

Ai tha se ndërtimi i një shoqërie të qëndrueshme dhe moderne kërkon dialog, respekt të ndërsjellë dhe gatishmëri për të punuar së bashku.

"U bëj thirrje të jetojmë së bashku, të ndërtojmë së bashku dhe të ecim së bashku drejt së ardhmes evropiane", theksoi Fetai.

Kjo ditë, theksoi, përfaqëson një moment të rëndësishëm në zhvillimin arsimor dhe kulturor të vendit tonë. Na kujton se një gjuhë e standardizuar nuk është vetëm një mjet komunikimi, por edhe një hap i domosdoshëm drejt modernizimit të shoqërisë dhe ndërtimit të institucioneve funksionale. Në qytetin e Manastirit, ku sot ndodhet Muzeu i Alfabetit, u hodhën themelet e shkrimit modern të gjuhës shqipe. Për ne, Kongresi i Manastirit mbetet një nga ngjarjet më të rëndësishme të fillimit të shekullit të 20-të, i cili i dha strukturë dhe standard gjuhës shqipe dhe që ndikoi drejtpërdrejt në proceset arsimore dhe kulturore", nënvizoi Fetai.

Sipas tij, me shënimin e Ditës së Alfabetit të gjuhës shqipe, theksohet një parim thelbësor. "Në një shtet multietnik si i yni, barazia gjuhësore është pjesë e demokracisë funksionale dhe standardeve evropiane për të drejtat e qytetarëve. Shtetet moderne e matin cilësinë e demokracisë së tyre jo vetëm përmes funksionalitetit të institucioneve, por edhe përmes mënyrës se si i trajtojnë gjuhët e komuniteteve që bashkëjetojnë brenda tyre. Në këtë kontekst, barazia gjuhësore nuk është një çështje simbolike, është një parim dhe praktikë demokratike që e afron vendin tonë me të ardhmen që dëshirojmë", tha zëvendëskryeministri Fetai.

Më 22 nëntor shënohet përvjetori i Kongresit të Manastirit, ku dhjetëra shkenctarë shqiptarë u takuan nga 14 deri më 22 nëntor 1908, për të krijuar alfabetin e gjuhës shqipe. Kongresi për unifikimin e alfabetit të gjuhës shqipe përfaqëson një nga ngjarjet më të rëndësishme në historinë e kulturës dhe të popullit shqiptar në tërësi.

Që nga 22 nëntori 2007, Dita e Alfabetit të gjuhës shqipe festohet si festë zyrtare dhe është ditë jo pune për shqiptarët e Maqedonisë së Veriut. ls/

Foto: MIA