Shkup, 13 shkurt 2025 (MIA) - Vazhdim të funksionit gjyqësor-prokurorial edhe pas plotësimit të moshës së përcaktuar për pension deri në 67 vjet, parashikon Propozim-ligji për ndryshime dhe plotësime të Ligjit për marrëdhënie pune që kaloi sot në komisionin kuvendor për çështje ekonomike, punë dhe politikë energjetike.

Qëllimi i ndryshimeve, siç sqaruan propozuesit, është tejkalimi i gjendjes në gjyqësor nga aspekti i deficitit të resurseve njerëzore dhe funksionimi adekuat i sistemit gjyqësor, përkatësisht zgjidhja e të gjitha lëndëve dhe eliminimi i justifikimeve se për çdo lloj veprimi nuk ka mjaft gjykatës dhe prokurorë.

Sipas opozitës, zgjidhja është e pjesshme dhe diskriminuese sepse nuk u mundëson vazhdim të stazhit edhe ekspertëve të lartë, teknologëve, inxhinierëve,...të cilët i nevojiten shtetit si dhe punëtorëve në sektorin privat, veçanërisht atyre me drejtime deficitare.

"Një numër i madh njerëzish në sistemin e drejtësisë po dalin në pension dhe në periudhën e kaluar ka pasur skandale shumë të rënda në funksionimin e Akademisë së Gjyqtarëve dhe Prokurorëve Publikë për persona të caktuar të përzgjedhur dhe mënyrën se si kandidatët janë pranuar me teste që i nënshtrohen procedurës hetimore. Për të shmangur një boshllëk të caktuar në funksionim dhe shohim se në këtë periudhë po intensifikohet lufta kundër korrupsionit dhe po shtohet numri i hetimeve të hapura dhe dëshmive të dorëzuara në prokurorinë publike, besojmë se në këtë mënyrë do të sigurohet përfaqësimi i duhur në drejtim të veprimit për të gjitha indikacionet për krime të kryera dhe çështjet e hapura para Prokurorisë", theksoi deputeti Bojan Stojanovski nga VMRO-DPMNE dhe njëri nga propozuesit e tekstit.

Ideja e propozuesve të ligjit, përmendi, është të gjitha rastet e hapura të përfundojnë.

"Qëllimi është që autoritetet përgjegjëse për marrjen e provave t'i mbledhin ato dhe t'ia dorëzojnë Prokurorisë Publike, e cila më pas do t'i përkthejë në aktakuzë dhe do t'ua dërgojë gjykatave që gjyqtarët të veprojnë. Ne thamë se do të luftojmë pamëshirshëm korrupsionin dhe krimin. Nuk do të lejojmë që askush të amnistohet për shkak të një mbikëqyrjeje të tillë sistematike që është bërë qëllimisht në vitet e kaluara. Drejtësia duhet të zbatohet njësoj për të gjithë dhe askush nuk mund të ankohet se nuk ka mjaft gjyqtarë apo prokurorë për t'i përfunduar rastet", tha Stojanovski.

Për Propozimin kishte tre amendamente, të gjitha të dorëzuara nga Monika Zajkova nga PLD, por asnjë nuk ishte pranuar.

Dimitar Kovaçevski nga LSDM vlerësoi se zgjidhja e propozuar është e pjesshme dhe në ndonjë mënyrë diskriminuese sepse me të, përveç gjyqtarëve, stazhi i vazhduar u mundësohet edhe të gjithë funksionarëve të zgjedhur dhe të emëruar, drejtorëve,...por edhe ekspertëve të lartë, teknologëve, inxhinierëve...të cilët i nevojiten vendit.

Kjo u pasua nga Jovanka Trençevska, sipas së cilës ligji duhet të tërhiqet dhe punëtorët e sektorit privat, veçanërisht ata me profile deficitare, të lejohen të pensionohen më vonë.

"Nëse do të donit që vendimi të zbatohej vetëm për gjyqtarët dhe prokurorët publik, mund ta përfshinit në Ligjin për Gjykatat dhe Prokurorët Publikë. Ndoshta atëherë do të besojmë se qëllimi është në të vërtetë vetëm për ata dhe jo për të gjithë personat e zgjedhur dhe të emëruar. Gjithashtu, personat e zgjedhur dhe të emëruar me mandate të kufizuar dhe të pakufizuar nuk mund të futen në të njëjtën shportë sepse nuk është e drejtë që ata që janë të privilegjuar në paga të jenë të privilegjuar edhe në zgjatjen e jetës së tyre të punës", theksoi Trençevska.

Komisioni e ka përcjellë Propozim-Ligjin për ndryshime dhe plotësime të Ligjit për marrëdhënie pune me procedurë të mëtutjeshme në Kuvend. sa/

foto: printskrin