Dellçevë, 13 nëntor 2025 (MIA) - Në Shtëpinë Përkujtimore ASNOM në Dellçevë sonte u hap ekspozita personale artistike e Reshat Ametit, një artist i shquar me një prani të gjatë dhe kontribut të rëndësishëm në skenën artistike të Maqedonisë dhe botës. Ekspozita është organizuar nga Institucioni Kombëtar Qendra për Kulturë "Nikolla Jonkov Vapcarov" - Dellçevë, me mbështetjen e Ministrisë së Kulturës dhe Turizmit.

Drejtori i Qendrës, Zllatko Naçovski, vuri në dukje se Dellçeva është krenare që hap ekspozitën e njërit prej artistëve më të rëndësishëm bashkëkohor të Maqedonisë.

"Kjo ekspozitë është rezultat i bashkëpunimit dhe miqësisë afatgjatë me profesorin Reshat Ameti. Veprat e tij janë prezantuar në shumë vende të botës - nga Japonia dhe Kina, përmes Italisë, Gjermanisë, Francës, deri në Austri dhe Zvicër. Ato njihen kudo për shprehjen e tyre të veçantë, emocionin dhe thellësinë shpirtërore. Sot, me kënaqësi të veçantë mund të themi se bota artistike e profesor Ametit ka mbërritur edhe në Dellçevë", tha Naçovski.

Autori i ekspozitës, Reshat Ameti, shprehu mirënjohjen e tij për mundësinë për të ekspozuar në Dellçevë dhe për pritjen e ngrohtë nga publiku.

"Çdo qytet ka shpirtin e vet. Dellçeva ka dritën e artë që e mbush hapësirën me energji shpirtërore. Arti ekziston vetëm nëse ndahet me njerëzit. Është drita shpirtërore që na udhëheq - jo vetëm ajo fizike. Kudo që shkoj, e mbaj me vete Maqedoninë, ngjyrat dhe shpirtin e saj", tha Ameti. sa/

Foto: MIA