Londër, 8 dhjetor 2025 (MIA) - Sekretari britanik i Mbrojtjes, Xhon Hili, deklaroi se Britania dhe aleatët e saj janë të gatshëm të "ndjekin dhe zbrapsin" nëndetëset ruse, duke zbuluar planet për një forcë të re multi-milionëshe me teknologji të lartë për të mbrojtur kabllot dhe tubacionet nënujore.

Forcat hibride detare, të quajtura "Bastioni i Atlantikut" (Atlantic Bastion), do të kombinojnë automjete autonome dhe inteligjencë artificiale (IA) me anije luftarake dhe aeroplanë për të identifikuar kërcënimet ndaj strukturave nënujore dhe për t'i mbrojtur ato nga sulmet, raporton DPA.

Infrastruktura nënujore është thelbësore për lidhjen e Britanisë, duke transportuar 99 për qind të të dhënave ndërkombëtare të telekomunikacionit dhe burimeve jetësore të energjisë si energjia elektrike, nafta dhe gazi.

Ky veprim vjen pasi u raportua së fundmi se kabllot në Detin Baltik ishin dëmtuar dhe inteligjenca e mbrojtjes e Mbretërisë së Bashkuar ka zbuluar se Rusia po modernizon flotën e saj për të synuar kabllot dhe tubacionet nënujore.

Duke folur gjatë një vizite në bazën detare Portsmuth, Hili deklaroi për Pres asoshiejshn: "Ne e dimë se çfarë po bën Putini. Ne e dimë se çfarë po zhvillon Putini".

"Dhe ne kemi parë në javët e fundit, për shembull, anijen e tyre spiune, Jantar, që hyn dhe del nga ujërat e Mbretërisë së Bashkuar dhe ne jemi në gjendje t'i gjejmë ata, pavarësisht nëse janë në sipërfaqe apo nën ujë. Ne jemi në gjendje t'i gjejmë, t'i ndjekim dhe nëse është e nevojshme, jemi të përgatitur të veprojmë me aleatët për t'i zbrapsur ato", tha ai.

Bastioni i Atlantikut do të përfshijë zhvillimin dhe testimin e teknologjisë më moderne të sensorëve kundër nëndetëseve.

"Njerëzit nuk duhet të dyshojnë në kërcënimet e reja me të cilat përballet Mbretëria e Bashkuar dhe aleatët tanë nën det, ku kundërshtarët po synojnë infrastrukturën që është kaq kritike për mënyrën tonë të jetesës", shtoi Hili.

"Kjo epokë e re kërcënimesh kërkon një epokë të re mbrojtjeje dhe ne duhet të inovojmë me shpejtësi me një ritëm lufte për të ruajtur avantazhin tonë në fushën e betejës ndërsa dorëzojmë rishikimin strategjik të mbrojtjes. Programi ynë pionier i Bastionit të Atlantikut është një plan për të ardhmen e Marinës Mbretërore", tha ministri britanik.

Ai tha se programi kombinon teknologjitë më të fundit autonome dhe të inteligjencës artificiale me anije luftarake dhe aeroplanë të klasit botëror për të krijuar një forcë luftarake hibride shumë të përparuar për të zbuluar, penguar dhe mposhtur ata që kërcënojnë.

Projekti është nisur me një investim fillestar prej 14 milionë stërlinash nga Ministria e Mbrojtjes dhe industria për testim dhe zhvillim, me propozime të paraqitura nga 26 kompani nga Mbretëria e Bashkuar dhe Evropa. mb/

Foto: Ministria britanike e Mbrojtjes