Novosellë, 30 mars 2025 (MIA) - Kryeministri Hristijan Mickoski konsideron se propozimi i kryetarit të LSDM-së, Venko Filipçe për takim të liderëve është temë shumë serioze për t'u diskutuar përmes mediave.

"Takimi i liderëve është një temë shumë serioze për t'u biseduar përmes mediave. Nga ajo sa kuptova në publik është se Filipçe ka një lloj propozim, një plan. Ai mund ta bëjë të ditur atë plan përmes një konference për shtyp, por nëse vlerëson se duhet të më informojë dhe të më prezantojë paraprakisht, unë jam gjithmonë këtu. Temat serioze kërkojnë qasje serioze", tha Mickoski, duke u përgjigjur në pyetjen e gazetarëve në Novosellë të Strumicës, ku ishte duke inspektuar aktivitetet ndërtimore të projektit për ndërtimin e shtegut për ecje dhe rekreacion nga Novosella në Mokrievë. 

 Ai tha se ishte gati ta presë dhe të bisedojnë në këtë temë.

Kryetari i LSDM-së, Venko Filipçe, në Mbrëmjen e donatorëve për ndihmë  të familjeve të viktimave dhe të lënduarve nga zjarri në Koçan, paralajmëroi se javën e ardhshme  në Kuvend do t'i thërrasë në takim liderët e partive më të mëdha politike të cilëve do t'ua prezantojë planin e tij -  të cilin e konsideron obligim për shtetin, sepse, siç tha, "është e qartë se mënyrat konvencionale të udhëheqjes së politikës, të luftës politike, nuk japin rezultate të shpejta". 

Nga koalicioni qeveritar "VLEN" konsiderojnë se kryetari i LSDM-së Venko Filipçe nuk ka kredibilitet për të thirrur në takim të liderëve.

"Pas paralajmërimeve të LSDM-së se do të kërkojnë Komisionin Anketues për Koçanin, i cili padyshim është në koordinim me aleatët e tyre të BDI-së, të cilët me naivitet besojnë se mund të paraqiten si viktima të rrejshme të ndjekjes politike, z. Venko Filipçe konfirmoi se ka për qëllim ta politizojë tragjedinë kolektive dhe kështu nuk ka kredibilitet për të thirrur takim  të liderëve. E kanë të mjaftueshëm koordinimin me BDI-në", thuhet në qëndrimin e koalicionit të Vlenit dërguar mediave. 

 Partia "ZNAM" do të prononcohet nëse do të marrë pjesë në një takim të liderëve pasi të marrë iniciativën e paralajmëruar nga Filipçe.

"Të marrim iniciativën dhe ta shohim, pastaj do të proncohemi", deklaruan nga partia. 

Nga Bashkimi Demokratik për Integrim (BDI) theksuan se fillimisht duhet të krijohet një komision parlamentar me mbikëqyrje ndërkombëtare, e më pas të mendohet  për hapa të tjerë. 

 "Prandaj, ju bëjmë thirrje të gjithë deputetëve që nuk dëshirojnë që një nga tragjeditë më të mëdha në shtet vend të përfundojë me farsën më të madhe juridike të drejtësisë selektive dhe robërimit të shtetit, të nënshkruajnë sot iniciativën e "Frontit Europian" për formimin e këtij komisioni", theksojnë nga BDI.

Foto: Qeveria