Kavadar, 6 dhjetor 2025 (MIA) - Nëse kemi mësuar diçka në të gjitha këto vite, është se Maqedonia nuk bie kur është vështirë - ajo bie kur dorëzohet. Sot refuzojmë të dorëzohemi. Refuzojmë të pranojmë idenë se një shtet i vogël duhet të ketë ambicie të vogla. Refuzojmë të besojmë se fëmijët tanë duhet të shkojnë jashtë vendit për të pasur sukses. Refuzojmë të pranojmë historinë se Maqedonia është shumë e vogël për gjëra të mëdha, tha lideri i VMRO-DPMNE-së, Hristijan Mickoski, i cili është edhe kryetar aktual i Qeverisë.

Në kongresin e partisë që mbahet në Kavadar, Mickoski u tha bashkëpartiakëve dhe mbështetësve të partisë se Maqedonia po hyn në një dekadë pjekurie dhe se shteti duhet të ketë sukses.

"Maqedonia është aq e madhe sa vullneti ynë për ta bërë më të mirë. Dhe sot ky vullnet ekziston. Është i pjekur. Më i fortë se kurrë. Sepse sot nuk po fillojmë diçka të re - sot po vazhdojmë diçka që është nisur breza më parë. Po vazhdojmë ndjekjen e shtetësisë; të dinjitetit; të një vendi nën Diell që askush nuk mund të na e heqë. Le të dëgjohet nga kjo sallë në çdo shtëpi në vend: kjo është koha e krijimit, jo e pritjes. E vizionit, jo e frikës. E bashkimit, jo e llogaritjeve. E ndërtimit, jo e kërkimfaljes. Maqedonia po hyn në dekadën e pjekurisë. Dhe ne, të mbledhur sot, jemi të detyruar të jemi brezi që do të vendosë vijën themelore: që shteti mundet, që shteti di dhe që shteti do të ketë sukses. Ky është premtimi ynë. Ky është zotimi ynë. Ky është misioni ynë", nënvizoi Mickoski.

Ai tha se një vend nuk ndërtohet me fjalë, por me karakter, dhe se e ardhmja nuk krijohet nga fjalime të guximshme, por nga vendime të guximshme. sa/

Foto: MIA