Kavadar, 6 dhjetor 2025 (MIA) - Ekonomia e Maqedonisë duhet të dalë nga kurthi historik i pagave të ulëta, punës së lirë dhe prodhimit të kufizuar. Deri në vitin 2030, vendi duhet të bëjë një kalim strukturor - nga një ekonomi e prodhimit të lirë në një ekonomi të dijes, kompetencave të larta dhe vlerës së shtuar, tha kryeministri Hristijan Mickoski në kongresin e partisë VMRO-DPMNE që mbahet në Kavadar.

Duke u përqendruar në ekonomi në fjalimin e tij para të pranishmëve, Mickoski tha se shteti duhet të braktisë modelin e produktivitetit të ulët dhe varësisë nga importet dhe të kalojë në një ekonomi të bazuar në dije, teknologji dhe inovacion. 

"Ky kalim kërkon një cikël reformash sistemike në disa fusha: industri të bazuara në njohuri, teknologji, TIK, bioteknologji, farmaci, inxhinieri, industri krijuese - kjo është matrica e re ekonomike. Vendi duhet të investojë në fusha që krijojnë vlerë të shtuar dhe konkurrueshmëri të lartë në tregun global. Digjitalizimi dhe automatizimi janë një parakusht për t'u bashkuar me zinxhirët evropianë dhe globalë të prodhimit. Modernizimi i sektorit të biznesit, teknologjitë e reja digjitale dhe parqet teknologjike do të krijojnë vende pune me vlerë të shtuar të lartë dhe do të rrisin kapacitetin e eksportit. Kompanitë vendase duhet të bëhen një motor rritjeje përmes mbështetjes së fortë institucionale: injektimi i kapitalit, linjat e kreditit, barrierat e reduktuara administrative dhe stimuj të rritjes. Ekonomia kombëtare është e fortë vetëm nëse ndërmarrjet vendase janë të forta. Politika fiskale e parashikueshme, rregullat e qëndrueshme tatimore dhe planifikimi strategjik afatgjatë, të harmonizuar me standardet evropiane - janë një parakusht për zhvillim. Asnjë kompani nuk investon në një shtet në të cilin rregullat tatimore ndryshojnë me politikën e përditshme. Besimi ndërtohet me afatgjatësi, qartësi dhe transparencë", tha Mickoski.

 Ekonomia e gjelbër, siç theksoi nuk është një projekt ideologjik, por një domosdoshmëri shtetërore dhe duhet të investohet në burime të rinovueshme të energjisë, modernizimin e sistemit të transmetimit dhe projekte rajonale të energjisë për të zvogëluar varësinë dhe të krijohet  një dinamikë e re ekonomike.

 "Stabiliteti dhe zhvillimi janë të pamundur pa besim në shtet, ndërsa besimi ndërtohet vetëm përmes institucioneve të pavarura, sundimit të ligjit dhe sistemeve që krijojnë drejtësi, jo varësi. Pa besim në institucione - nuk ka shtet. Sundimi i ligjit nuk është një sërë ligjesh, por zbatimi i tyre konsistent. Maqedonia duhet të kalojë kufirin nga demokracia formale në atë funksionale", theksoi Mickoski

Theksoi dhjetë parime që përcaktojnë paradigmën e lidershipit modern - dinjiteti mbi të gjitha, drejtësia si autoritet i vetëm legjitim, dija si forma më e lartë e kapitalit, një shtet i fortë por jo dominues, një komb si komunitet, një ekonomi tregu që krijon mundësi, institucione që janë thelbi i demokracisë, një orientim evropian si një angazhim qytetërues - jo një taktikë, por një vlerë, teknologjia dhe qëndrueshmëria si forma të reja të zhvillimit dhe një shoqëri që ndërtohet me besim.

 Foto: MIA