Tetovë, 7 shkurt 2025 (MIA) - Policia ka evidentuar mbi 240 alarme për bomba të vendosura nëpër shkolla dhe të gjitha janë konstatuar se janë të rreme, tha sot drejtori i Byrosë për Siguri Publike, Aleksandar Janev nga Tetova. Pas gjashtë orëve nga alarmi i parë dhe puna në terren, ai vlerësoi se siguria në të gjithë vendin është stabile dhe solide.

"Nuk ka nevojë për panik, qytetarët, prindërit dhe të gjithë mësimdhënësit në shkolla të jenë të qetë. Bëhet fjalë për alarme të rreme, për bomba kudo që e kemi bërë. Këto janë gjëra dhe të gjitha kontrollet treguan se ishin alarme të rreme për bomba. Bëhet fjalë për më shumë se 240 alarme. Të gjithë pjesëtarët e policisë së Maqedonisë së Veriut reaguan me ndërgjegje, shpejt dhe me qetësi pa shkaktuar panik. Shkonin në shkolla, bisedonin me drejtorët e shkollave dhe bënin inspektime aty ku duhej. Kemi një protokoll dhe algoritëm  pas të cilit ne veprojmë. Aty ku parametrat ishin pozitivë, gjegjësisht në zonën e gjelbër - mësimi vazhdoi, ku kishte parametra të caktuar në zonat tjera, u bënë kontrolle shtesë dhe kudo ishin alarme të rreme", theksoi Janevi.

 Hetohet se cili është qëllimi dhe sfondi i këtyre alarmeve të rreme.

 "Tashmë jemi duke bashkëpunuar me partnerët tanë nga Interpoli dhe Europoli. Kemi disa gjurmë, nëse mund të them kështu, dhe kemi komunikuar si me kolegët nga Kroacia ashtu edhe me kolegët nga Hungaria, të cilët u përballën me të njëjtën gjë para disa ditëve, dhe Hungaria, mendoj, diku rreth 23 janarit, u përball me të njëjtat situata. Policia po ashtu është duke biseduar me të gjithë drejtorët e shkollave dhe gjatë ditës do të marrë udhëzime të qarta se çfarë duhet bërë në të ardhmen nëse e gjitha kjo ndodh", theksoi Janevi.

 MPB-ja do t'i ndërmarrë të gjitha masat parandaluese dhe represive nëse është e nevojshme dhe do të zbulojë pse po bëhen alarme të tilla të rreme, tha drejtori në pyetjet e gazetarëve.

 Në sheshin e qytetit në Tetovë, në organizim të Byrosë për Siguri Publike, sot u mbajt karvani "Te ju, për ju", me qëllim të aktiviteteve edukative interaktive për qytetarët në temën e parandalimit të krimit në shtet, si dhe kujdesin ndaj komunitetit.

Foto: MIA