Shkup, 24 nëntor 2025 (MIA) - Fillimin e një procesi reformash të Ligjit për Vullnetarizmin sipas shembullit të ligjeve evropiane paralajmëroi sonte ministri i Ekonomisë Besar Durmishi, i cili mbajti fjalimin hyrës para fillimit të nesërm të Konferencës së Parë Rajonale të Vullnetarizmit "Urat e Përvojës: Forcimi i Vullnetarizmit të Seniorëve për Zhvillim të Qëndrueshëm në të gjithë Ballkanin".

Sipas Durmishit, procesi do të jetë i hapur dhe gjithëpërfshirës dhe do të konsultohen të gjithë palët e interesuara - nga organizatat që angazhojnë vullnetarë, deri te vetë vullnetarët, ekspertët dhe bashkësia lokale. 

 "Kjo konferencë është e para dhe është fillimi i bisedimeve që do të vazhdojnë në institucione, organizata të shoqërisë civile, në organizatat tona partnere në rajon dhe Evropë. Besoj se në këto dy ditë do të dëgjojmë shumë ide që mund të ndryshojnë realitetin. Detyra jonë është t'u japim jetë këtyre ideve dhe të tregojmë se vullnetarizmi është një nga investimet më të vlefshme në shoqëri, të tregojmë se rajoni mund të ndërtojë ura, të ndajë përvoja dhe të krijojë modele të reja bashkëpunimi", tha Durmishi.

Ligji, siç theksoi, duhet t'i pasqyrojë realitetet e reja sepse shoqëria po ndryshon, dhe vullnetarizmi duhet të ndryshojë bashkë me të. 

 "Ballkani ka reputacionin si një vend me sfida të shumta, por e vërteta është se në  Ballkan jetojnë njerëz të cilët në të vërtetë e kuptojnë vlerën e solidaritetit. Vitet e fundit, kemi parë se sa i madh është kontributi në aksione humanitare, në iniciativa lokale, madje edhe në situata si tragjedia në Koçan. Shoqëria po ndryshon dhe vullnetarizmi duhet të ndryshojë me të. Jetojmë në një kohë ndryshimesh të shpejta dhe mënyra se si funksionojmë, punojmë, komunikojmë - e gjithë kjo ka ndryshuar rrënjësisht në dekadën e fundit", theksoi Durmishi.

 Sipas ambasadorit të BE-së, Mihales Rokas, konferenca, e cila zyrtarisht fillon nesër, vjen në kohën e duhur.

"Vjen në një kohë kur nuk duhet të lëmë askënd pas dore dhe kur duhet të bëjmë çdo përpjekje të mundshme për ta sjellë këtë vend, Maqedoninë e Veriut, në Bashkimin Evropian", tha Rokasi. 

 Konferenca, hapja zyrtare e së cilës është planifikuar për nesër në orën 9, organizohet në organizim të Asociacionit për Sport dhe Vullnetarizëm (ASV) në partneritet me Ministrinë e Ekonomisë dhe Punës të Republikës së Maqedonisë së Veriut dhe me mbështetjen e Institutit për Qeverisje të Mirë dhe Perspektiva Euro-Atlantike (IDUEP) dhe organizatave partnere të BE-së: Qendrës për Vullnetarizëm Evropian (CEV) dhe Konfederatës së Shërbimeve Evropiane për Ekspertë të Lartë (CESES).

 Në hapjen zyrtare, sipas paralajmërimit të organizatorit, fjalime do të mbajnë ministri i Çështjeve Evropiane Orhan Murtezani dhe drejtori ekzekutiv i CESES Bruksel, Ismael Paez Civiko.

 "Konferenca ka për qëllim të inkurajojë diskutime të hapura dhe konstruktive, të mundësojë krijimin e partneriteteve rajonale, si dhe të kontribuojë në hartimin e politikave të përbashkëta për zhvillimin e vullnetarizmit. Theks i veçantë do të vihet në rolin e seniorëve -  vullnetarëve mbi 50 vjeç, angazhimi afatgjatë profesional dhe shoqëror i të cilëve përfaqëson një potencial të rëndësishëm për transferimin e njohurive, mirëkuptimin ndërgjeneracional dhe forcimin e komuniteteve. Në këtë ngjarje do të marrin pjesë përfaqësues të lartë të institucioneve nga vendi dhe rajoni, ministra dhe zëvendësministra, përfaqësues të sektorit civil dhe privat, organizatave ndërkombëtare dhe komunitetit akademik", njoftuan organizatorët.

 Konferenca organizohet në kuadër të shpalljes së vitit 2026 si Viti Ndërkombëtar i Vullnetarëve për Zhvillim të Qëndrueshëm (IVY 2026) nga ana e Kombeve të Bashkuara.

Foto: MIA