Bruksel, 26 janar 2026 (MIA) – Komisioni Evropian është i vetëdijshëm për shqetësimin të cilin e shprehin operatorët transportues nga Ballkani Perëndimor, me kujdes e ndjek situatën me bllokadat në vendkalimet kufitare dhe është në kontakt me partnerët e rajonit, deklaroi sot zëdhënësi i KE-së për Punë të Brendshme, Markus Lamert. 

Deklarata e Lamertit ishte përgjigje e pyetjes së gazetarëve për qëndrimin e KE-së rreth bllokadave në vendkalimet kufitare drejt zonës Shengen nga ana e transportuesve ballkanikë dhe akuzave të tyre se sistemi EES i diskriminon në krahasim me kolegët e tyre të BE-së, si dhe nëse Unioni planifikon që shoferëve profesionistë tu ndajë status të veçantë dhe të mos i trajtojë si turistë gjatë hyrjes në bllok. 

"Jemi të vetëdijshëm se një numër i madh profesionistësh nga vendet e treta mund të kenë nevojë të qëndrojnë në zonën Shengen për më shumë se 90 ditë brenda një periudhe 180-ditore. Kjo përfshin profesione shumë të lëvizshme, siç janë shoferët e kamionëve, por edhe sportistët dhe artistët. Kjo lidhet gjithashtu me rregullat kombëtare dhe marrëveshjet ekzistuese dypalëshe. Kjo është një çështje për të cilën jemi plotësisht të përkushtuar dhe për të cilën po punojmë dhe po reflektojmë në kontekstin e përgatitjeve për Strategjinë e ardhshme të vizave, të cilën do ta publikojmë këtë javë", deklaroi Lamert.

Ai përsëriti se Sistemi për hyrje-dalje (EES) nuk vendos kurrfarë rregullore të reja dhe kurrfarë kërkesa të reja në lidhje me shpejtësinë e qëndrimit në zonën Shengen, por vetëm siguron zbatim më të mirë të rregullave ekzistuese dhe zbulim sistematik të praktikave jo të rregullta. 

"Sipas rregullave të Shengenit, qytetarët e vendeve që nuk kërkojnë vizë për të hyrë në BE kanë të drejtë të qëndrojnë në zonën Shengen për 90 ditë në një periudhë 180-ditore në çdo vend. Përtej kësaj, qëndrimi duhet të mbulohet nga një vizë ose marrëveshje kombëtare", shtoi Lamert.

Sipas tij, është e rëndësishme të theksohet se këto rregulla nuk janë të reja, por kanë qenë në fuqi prej vitesh në mënyrë të barabartë në të gjithë territorin e zonës Shengen dhe se ato tashmë parashikojnë njëfarë fleksibiliteti në lidhje me disa kategori punëtorësh. fc/

Foto: Arkivi i MIA-s