Tetovë, 24 nëntor 2025 (MIA) – Kryetari i Tetovës, Bilall Kasami sot ia dorëzoi vendimin për emërimin në funksionin zëvendëskryetar Albi Qamilit, i cili ishte bartës liste i kandidatëve për këshilltarë. Qamili është 27-vjeçar – politikolog i diplomuar dhe aktualisht po magjistron në të drejtën kushtetuese. 

“Albi Qamili është një nga aktivistët e rëndësishëm të të rinjve në Tetovë, i cili në të kaluarën kontribuoi në ndryshimet që ndodhën në Tetovë, duke marrë parasysh edhe faktin që jam i angazhuar jashtë detyrës së kryetarit të komunës, në pjesën politike, kjo do të kontribuojë që aktivitetet brenda komunës së Tetovës të mos ngecin dhe shërbimi që u ofrojmë qytetarëve tanë të jetë  pa të meta. Në këtë drejtim, jam i sigurt se Albi Qamili do të jetë një mbështetje e rëndësishme dhe një mbështetje e fortë për zbatimin e të gjitha projekteve në të mirë të qytetarëve”, theksoi Kasami.

Ai tha edhe se me këtë vendim, dëshiron të dërgojë porosi se si kryetar i vlerëson të rinjtë dhe i inkurajon të ndërmarrin përgjegjësi dhe të kontribuojnë për Tetovë më të mirë dhe më të zhvilluar. 

“Është një kënaqësi e vërtetë të jem i dyti aty ku Bilall Kasami është i pari. Ju siguroj se do ta kryej këtë detyrë me përgjegjësi, duke marrë parasysh besimin tuaj, pritjet dhe prioritetet tuaja dhe platformën tonë fituese për kapitullin e dytë të zhvillimit të Tetovës. Jam i nderuar që kam mundësinë të kontribuoj për një Tetovë edhe më të mirë, edhe më të zhvilluar, edhe më të pastër dhe më funksionale si këshilltar, por tani edhe si nënkryetar komune. Transformimi i Tetovës që filloi katër vjet më parë me Bilall Kasamin në krye duhet të vazhdojë edhe më fort në mandatin e dytë të kryetarit më të suksesshëm dhe më të vlefshëm që Tetova ka pasur ndonjëherë”, tha Albi Qamili.

Kasami sqaroi se nëse ka nevojë Qamili ta zëvendësojë, ai si kryetar e njofton Këshillin se një këshilltar i caktuar e zëvendëson në funksionin e kryetarit. Në këtë periudhë kohore, në të njëjtën kohë nuk mund të jetë edhe këshilltar dhe ai funksion do të pushojë. fc/

Foto: MIA