Uashington, 7 dhjetor 2025 (MIA) - I dërguari i presidentit të SHBA-së Donald Tramp për Ukrainën tha se një marrëveshje për t'i dhënë fund luftës në Ukrainë është "shumë afër" dhe se tani varet nga zgjidhja e dy çështjeve të mëdha të hapura - e ardhmja e rajonit ukrainas të Donbasit dhe termocentrali bërthamor Zaporozhje.

Rusia nisi një pushtim të madh të Ukrainës në shkurt të vitit 2022, pas tetë vitesh luftimesh midis separatistëve të mbështetur nga Rusia dhe trupave ukrainase në Donbas, i cili përbëhet nga rajonet e Donjeckut dhe Luganskut.

Lufta në Ukrainë është konflikti më vdekjeprurës në Evropë që nga Lufta e Dytë Botërore dhe ka shkaktuar konfliktin më të thellë midis Rusisë dhe Perëndimit që nga Lufta e Ftohtë.

Përfaqësuesi Special i SHBA-së për Ukrainën, Kit Kelog, i cili pritet të japë dorëheqjen në janar, në "Forumin Kombëtar të Mbrojtjes Regan" deklaroi se përpjekjet për të zgjidhur konfliktin kishin hyrë në "10 metra të fundit", të cilat, vuri në dukje ai, janë gjithmonë pjesa më e vështirë.

Dy çështjet kryesore të pazgjidhura, tha Kelog, kanë të bëjnë me territorin - kryesisht me të ardhmen e Donbasit - dhe të ardhmen e centralit bërthamor Zaporozhje të Ukrainës, më i madhi në Evropë, i cili është nën kontrollin rus.

"Nëse i zgjidhim këto dy çështje, mendoj se edhe pjesa tjetër e çështjeve do të zgjidhen mjaft mirë", tha Kelog në Bibliotekën dhe Muzeun Presidencial Ronald Regan në luginën Simi, Kaliforni.

"Pothuajse jemi afër qëllimit. Jemi shumë, shumë afër," tha Kelog. sa/

Foto: EPA