Shkup, 2 shkurt 2026 (MIA) - Mundësitë për lidhje institucionale në të ardhmen, me fokus të veçantë në zhvillimin, trajnimin dhe avancimin e kapaciteteve profesionale të shërbimit të Gjykatës, si dhe shkëmbimin e përvojave në fushën e mbrojtjes së të drejtave të njeriut, ishin në fokus të takimit të gjykatësve të Gjykatës Kushtetuese Osman Kadriu dhe Tatjana Vasiq-Bozaxhieva me kryetarin e Gjykatës Evropiane për të Drejtat e Njeriut, Matijas Gijomar në Strasburg.

 Siç bëjnë të ditur nga Gjykata Kushtetuese, të pranishmit ndanë të njëjtat pikëpamje për rëndësinë dhe domethënien e shkëmbimit të vazhdueshëm të njohurive dhe praktikave të mira, si dhe realizimin e aktiviteteve të përbashkëta midis Gjykatës Evropiane të të Drejtave të Njeriut dhe Këshillit të Evropës.

 Në takim morën pjesë edhe Svetllana Geleva, ambasadore, shefe e Misionit të Republikës së Maqedonisë së Veriut në Këshillin e Evropës, Jovan Ilievski, Gjykatës i Republikës së Maqedonisë së Veriut në Gjykatën Evropiane të të Drejtave të Njeriut, si dhe Abel Kampos, zëvendësregjistrues i GJEDNJ-së.

 Takimi është mbajtur në prag të ceremonisë së hapjes zyrtare të vitit gjyqësor të Gjykatës Evropiane të të Drejtave të Njeriut, i cili tradicionalisht shënohet çdo vit me një seminar tematik, më 30 janar të vitit 2026.

Në fokus të seminarit gjyqësor të këtij viti ishte tema "Mbrojtja e pluralizmit mediatik dhe procesit demokratik në kohëra sfiduese".

 Foto: Gjykata Kushtetuese