Shkup, 28 nëntor 2025 (MIA) - Fondi për Sigurim Pensional dhe Invalidor (FSPIM) informon opinionin se pagesa e pensioneve po zhvillohet normalisht dhe tashmë më 1 dhjetor 2025, pensionistët do të marrin pensionin e tyre të nëntorit me çka do të paguhen gjithsej 9.297.493.427 denarë (nëntë miliardë e 297 milionë e 493 mijë e 427 denarë).

"Pensionistët duhet të jenë të qetë, sepse Qeveria garanton pagesën e pensioneve dhe nuk duhet të ketë dyshim ose frikë se nuk do të ketë pensione. FSPIM në koordinim me Qeverinë, bën pagesën ditën e parë të muajit dhe do të vazhdojë ta bëjë këtë edhe në vitin 2026", njofton Fondi.

Informojnë se për vitin e ardhshëm 2026, Qeveria e Republikës së Maqedonisë së Veriut do të sigurojë pothuajse 151 miliardë denarë në Buxhetin për rritjen e pensioneve, sigurimin shëndetësor për pensionistët dhe kostot kalimtare për tre kompanitë e pensioneve nga shtylla e dytë.

"FSPIM njofton publikun se nga 1 tetori 2024 deri më 1 tetor 2025, kur paguhen pensionet e shtatorit për vitet 2024 dhe 2025, ato janë rritur nominalisht për 6.000 denarë. Në përqindje, rritja me pagesën e pensionit të shtatorit në vitin 2025, është rreth 29 për qind krahasuar me shumën e paguar për pensionin e gushtit në vitin 2024", thekson FSPIM në kumtesë.

Si ilustrim, duhet theksuar se më 1 shtator 2024, për pensionin e gushtit u paguan 7.210.341.000 denarë (shtatë miliardë e 210 milionë e 341 mijë denarë), dhe me rritjen prej 2.500 denarë më 1 tetor 2024, pagesa arriti në 8.166.689.000 denarë (tetë miliardë e 166 milionë e 689 mijë denarë). Më 1 tetor 2025, me rritjen e dytë prej 2.500 denarë për pensionin e marsit në vitin 2025 dhe përshtatjen lineare prej 1.000 denarë në pensionin e shtatorit të këtij viti, pagesa arrin 9.403.340.000 denarë (nëntë miliardë e 403 milionë e 340 mijë denarë).

FSPIM informon gjithashtu se fondet totale për pagesat e pensioneve me harmonizimin në vitin 2026 do të jenë më të larta për 30 miliardë denarë ose rreth 500 milionë euro.

"Të gjitha këto rritje dhe harmonizime të pensioneve kanë për qëllim përmirësimin e standardit të jetesës së pensionistëve dhe uljen e ndikimit të inflacionit në të. Sipas të dhënave zyrtare nga institucionet shtetërore, inflacioni në vitin 2024 arrin 3.5 për qind në vit dhe për këtë vit pritet të jetë 3.9 për qind. Të dhënat e paraqitura tregojnë se përqindja e rritjes së pensioneve nga shtatori 2024 deri në shtator 2025 është shumë më e lartë se inflacioni me të cilin po përballemi", thuhet në kumtesën e Fondit.

Foto: arkivi i MIA-s