Doha, 6 dhjetor 2025 (MIA) - Turqia është e gatshme të "bëjë çdo gjë që është e nevojshme" për të kontribuar në përpjekjet e vazhdueshme të paqes në lidhje me Gazën, deklaroi sot ministri turk i Punëve të Jashtm Hakan Fidan, raportoi Anadollu.

Fidani e bëri deklaratën gjatë edicionit të 23-të të Forumit të Dohas që mbahet në kryeqytetin e Katarit, duke iu përgjigjur pyetjes nëse Ankaraja po shqyrton dërgimin e trupave në Gazë. 

Duke deklaruar se po zhvillohet një diskutim gjithëpërfshirës për Forcat Ndërkombëtare për Stabilizim në Gazë, Fidani tha se po kryhet një vlerësim i plotë në lidhje me mënyrën se si do të vendosen forcat, cili do të jetë misioni i tyre dhe sipas cilave rregulla që do të funksionojnë. 

 Ai bëri thirrje për një qasje "realiste" ndaj misionit të forcës në përcaktimin e pritjeve, "sepse ekziston një realitet i caktuar në terren".

"Mendoj se qëllimi ynë i parë në vendosjen e Forcave Ndërkombëtare për Stabilizim duhet të jetë ndarja e palestinezëve nga izraelitët në vijën kufitare. Ky duhet të jetë qëllimi ynë kryesor. Pastaj, mund të punojmë për çështjet e tjera të mbetura", shtoi Fidani. 

 Që Forcat Ndërkombëtare për Stabilizim të jetë efektive, duhet të krijohen dhe trajnohen forcat policore, si dhe të formohen administrata lokale për të formuar një komitet paqeje, theksoi ai.

Mbetet e paqartë se cilat vende do të kontribuojnë drejt forcave, por procesi do të marrë formë gradualisht sapo të vendosen Forcat Ndërkombëtare për Stabilizim, theksoi ministri turk i Punëve të Jashtme. 

Duke theksuar se Ankaraja ka zbatuar një politikë të dyerve të hapura që nga lufta civile siriane, Fidani tha se kjo politikë shërben për qëllime humanitare. 

Nevojitet bashkëpunim ndërkombëtar që të sigurohet stabilitet në Siri, shtoi ai.

Ajo që presidenti amerikan Donald Tramp po përpiqet të bëjë në aspektin e ndërmjetësimit dhe aktiviteteve të ndërtimit të paqes përkon me interesat e Turqisë, deklaroi Fidani, duke përsëritur dëshirën e Ankarasë për një armëpushim në Ukrainë dhe Gazë. 

Lidhur me luftën e vazhdueshme Rusi-Ukrainë, shefi i diplomacisë turke tha se Evropa duket se ka nevojë për "zgjidhje më krijuese për t'u bërë më rezistente". 

 "Mendoj se e vetmja mënyrë e qëndrueshme për të vazhduar dhe për t'i dhënë fund kësaj lufte është përfshirja me besnikëri dhe energji në negociatat e paqes. Për momentin po zhvillohet një ndërmjetësim i mirë", tha ai.

"E di që Evropa ka të gjitha arsyet për të mos i besuar Rusisë, ndërsa gjithashtu edhe anasjelltas; nëse e dëgjoni Rusinë, ata kanë arsye për të mos i besuar askujt. Por, ata kanë pikëpamjen e tyre", shtoi Fidani. 

 Foto: Anadollu