Uashington, 24 janar 2026 (MIA) - SHBA-ja do të mbeten aleate kyçe e NATO-s dhe partnere e Evropës, por si prioritet do ta vendosin mbrojtjen e vendit dhe zbrapsjen e Kinës, sipas versionit të ri të Strategjisë për mbrojtje kombëtare të administratës së presidentit Donald Tramp, e cila u publikua vonë mbrëmë dhe u citua nga DPA.

Në dokument theksohet se Uashingtoni do të vazhdojë të luajë një rol qendror në NATO, edhe pse ndryshon praninë e saj ushtarake në Evropë. Ai shton se "ndërsa Evropa mbetet e rëndësishme, ajo ka një pjesë më të vogël dhe në rënie si një fuqi ekonomike botërore".

Strategjia vëren se ndërsa Shtetet e Bashkuara mbeten të përkushtuara ndaj Evropës, Uashingtoni "duhet dhe do t'i japë përparësi mbrojtjes së atdheut dhe pengimit të Kinës". Në Evropë dhe rajone të tjera, aleatët pritet të marrin drejtimin kundër kërcënimeve që janë më serioze për ta sesa për Uashingtonin, me "mbështetje kritike, por më të kufizuar nga SHBA-ja".

Uashingtoni do të punojë gjithashtu për të "zgjeruar bashkëpunimin ushtarako-industrial transatlantik dhe për të hequr barrierat" ndaj tregtisë së armëve midis SHBA-së dhe Evropës, me qëllim maksimizimin e "aftësisë kolektive për të siguruar forcat e nevojshme për të arritur objektivat e mbrojtjes", thuhet në dokument.

Strategjia prej 34 faqesh - e para e këtij lloji që nga viti 2022 - vëren se Shtetet e Bashkuara të Amerikës do të "mbrojnë në mënyrë aktive dhe pa frikë interesat e Amerikës në të gjithë Hemisferën Perëndimore".

Në dokument konkretisht përmendet aksesi në Kanalin e Panamasë dhe Grenlandën - vetëm disa ditë pasi që Trampi deklaroi se kishte arritur një "kornizë për një marrëveshje të ardhshme" mbi sigurinë e Arktikut me udhëheqësin e NATO-s, Mark Rute, që do t’i ofronte SHBA-së "akses të plotë" në ishullin Arktik - një territor i aleatit të NATO-s, Danimarkës.

Dokumenti i ri e sheh Kinën, të cilën administrata e ish-presidentit të SHBA-së, Xho Bajden, e konsideronte një kundërshtare të madhe - si një fuqi të vendosur në rajonin Indo-Paqësor që vetëm duhet të frenohet nga dominimi i SHBA-së ose aleatëve të saj. mb/

Foto: MIA