Uashington, 1 dhjetor 2025 (MIA) - Negociatat midis delegacioneve amerikane dhe ukrainase në Florida u fokusuan pothuajse ekskluzivisht në çështjen se ku do të vizatohet kufiri de fakto me Rusinë, si pjesë e një marrëveshje të mundshme paqësore, deklaruan për Aksios dy zyrtarë ukrainas.

Takimi, i cili zgjati pesë orë u vlerësua si "i vështirë" dhe "intensiv", por edhe produktiv.
Delegacioni amerikan, shkruan Aksios, erdhi në takim afër Majamit me qëllim që të arrinte përparim në çështjen e vijës territoriale, në mënyrë që i dërguari special i presidentit amerikan Stiv Uitkof, të mund t'ia paraqiste këtë përparim presidentit rus Vlladimir Putin në një takim të ardhshëm në Moskë.

Pas një diskutimi hyrës në një format të zgjeruar, bisedimet u ngushtuan në tre zyrtarë nga të dyja palët, ku praktikisht tema e vetme ishte vija e demarkacionit, pohon portali.
Nga pala amerikane, morën pjesë Uitkofi, sekretari amerikan i shtetit, Marko Rubio dhe këshilltari dhe dhëndri i Trampit, Xhared Kushner.

Delegacioni ukrainas përbëhej nga Këshilltari i sigurisë kombëtare Rustem Umerov, Shefi i Shtatmadhorisë, gjenerali Andrij Gnatov dhe zëvendësshefi i inteligjencës ushtarake, Vadim Skibicki.

Pas përfundimit të pjesës kryesore të negociatave, Umerovi dhe Uitkofi zhvilluan një takim të veçantë "kokë më kokë", pas të cilit Umerovi informoi presidentin ukrainas Volodimir Zelenski mbi rezultatet e bisedimeve.

“Ishte intensive, por jo edhe negative. Ne e vlerësojmë shumë angazhimin serioz të SHBA-së. Qëndrimi ynë është se duhet të bëjmë gjithçka që SHBA të ketë sukses, pa humbur territor dhe pa parandaluar agresion të ri”, tha një nga zyrtarët ukrainas.

Foto: EPA