Неготино, 28 октомври 2023 (МИА) - Дебатен клуб е формиран во Неготино, како плод на соработката на Младински образовен форум со регионалното здружение за заштита на животната средина, „Ековита“. Во текот на денешниот ден беше реализирана дебата. 

- Средношколци од гимназија „Свети Кирил и Методиј“ имаа вистинско искуство со тренинг на тема побивање, предавачи беа обучените тренери за дебата, Ристе Димов и Кирил Димитров. Во текот на тренингот, учениците се запознаа со елементите и техниките на побивање. Тие беа поделени на афирмација група и група за негација. Преку интерактивните дискусии, учениците научија многу и ги развиваа своите вештини за решавање на конфликти и спроведување на конструктивни дијалози, појасни Кристина Тодорова од здружението на граѓани „Ековита“. 

Тодорова ја поздрави соработката со Младински образовен форум и нагласи дека е од големо значење формирањето на еден ваков дебатен клуб. 

- Младински образовен форум работи на бројни проекти во кои се вклучени младите и затоа е задоволство да се соработува со нив. Целта е заедничка, развивање на позитивните вредности кај младите и унапредување на нивните знаења, бидејќи тие се нашата иднина, подвлече Тодорова. 

Денешната дебата се реализираше во просториите на шаховскиот клуб во Неготино. свд/аа/

Фото: „Ековита“