Скопје, 7 ноември 2025 (МИА) – Две нови имиња се најдоа на списокот повикани фудбалери што селекторот на македонската репрезентација до 21 година Горан Станиќ го објави денеска за ноемвриските натпревари против Шведска и Полска во рамки на квалификациите за пласман на Европското првенство 2026.

„Повик добија двајца нови фудбалери кои со своите игри во клубовите го заслужија повикот, Матео Софијаноски од Македонија Ѓ.П. и Реџеп Мурати од Башкими. Добро е што сите останати фудбалери имаат солидна минутажа во своите клубови и со тоа ја одржуваат формата на потребното ниво за ваков тип на натпревари.“, изјави Станиќ за официјалниот сајт на Фудбалската федерација на Македонија (ФФМ).

Македонската репрезентација на 13 ноември ја пречекува Шведска на стадионот „Петар Милошевски“ во Битола, а пет денови подоцна на истиот стадион ќе игра против Полска.

„Нè очекуваат два тешки натпревари против селекции кои играат модерен и брз фудбал, но ние имаме квалитет да се спротивставиме на кој било противник. Ќе играме храбро, како и на секој натпревар и целта ни е да постигнеме позитивен резултат“, посочи Станиќ.

По четири одиграни натпревари, македонската репрезентација е четвртопласирана во групата со три бодови.

„Анализирајќи ги претходните четири натпревари, можам да кажам дека резултатски не сум задоволен. Според прикажаната игра на теренот, заслуживме најмалку четири бода повеќе во дуелите со многу силни противници, кои се фаворити во нашата група. Сепак, скапо нè чинеа неколку индивидуални грешки. Против квалитетни репрезентации како овие со кои играме, нема простор за такви пропусти“, додаде селекторот Станиќ.

Повикани фудбалери:

Голмани: Васко Василев (Работнички), Љупче Џеков (Силекс), Славе Вргов (А.П. Брера);

Одбрана: Давид Даилоски (Венло, Холандија), Андрија Димески (Вождовац, Србија), Анес Мелиќи (Шкендија), Ѓорге Џеков (Силекс), Реџеп Мурати (Башкими), Меметриза Хамза (Струга Трим Љум), Џезаир Авдули (Арсими);

Среден ред: Матеј Ангелов (Работнички), Шабан Зенку (Струга Трим Љум), Адриан Зенделовски (Олимпик, Шведска), Матео Софијаноски (Македонија Ѓ.П.), Мартин Ѓоргиевски (Збројовка Брно, Чешка), Матеј Гаштаров (Црвена звезда, Србија);

Напад: Михаил Талевски (Вардар), Димитар Данев (Вардар), Кире Стојанов (А.П. Брера), Мухамед Елмас (Македонија Ѓ.П.), Дашмир Елези (Работнички), Димитар Трајков (Работнички).ег

ФОТО: ФФМ