Загреб, 21 февруари 2024 (МИА) - Хрватскиот тенисер Иво Карловиќ најави повлекување од професионалната кариера. Својот последен натпревар го одигра во октомври 2021 година во квалификациите за Мастерсот во Индијан Велс.

- Се надевам дека оваа порака ќе ве најде во добро расположение и со силен бекхенд! Некои од вас забележаа дека не сум играл турнир одамна и сè уште секојдневно ме прашуваат дали и кога ќе се вратам на турнеја. Жал ми е што ве разочарувам, но со ова писмо сакам официјално да го објавам моето повлекување од спортот, напиша Карловиќ на социјалните мрежи.

Четириесет и четиригодишниот Хрват истакна дека имал многу необична и долга кариера во тенисот.

- Имав многу пријатна, необична и долга кариера која започна многу скромно, особено за тенисер. Хрватска беше многу поинаква земја во 80-тите и 90-тите години кога јас растев и многу сум горд на моите достигнувања и на она што го надминав. Би сакал да им се заблагодарам на сите тренери и луѓе кои учествуваа во мојот развој како тенисер и придонесоа. Без вас овој успешен пат немаше да биде возможен, напиша Карловиќ.

Карловиќ е победник на осум АТП турнири во сингл, победник на Дејвис купот (2005) и Светскиот тимски куп (2006) како дел од хрватската репрезентација. Сопственик е на АТП рекордот за брзина на сервис - 251 км/ч. зс/

Фото: ЕПА