Скопје, 26 декември 2024

Градоначалниците на партнерските општини денес присуствуваа на стратешка средба во организација на здружението КОНЕКТ, на која се дискутираше за актуелните предизвици и приоритети во секоја од
општините, како и за досегашната локална имплементација на платформата за граѓанско учество
КОМУНИТИ (komuniti.mk).

КОМУНИТИ е првата интерактивна веб и мобилна апликација која овозможува директна комуникација
помеѓу граѓаните и општините, при што сите членови на заедниците – без оглед на возраста, потеклото
или техничкото знаење – можат активно да учествуваат во идентификување на проблемите во нивната
општина и изнаоѓање решенија.

„Без разлика дали се работи за јавен службеник, бизнисмен или граѓанин – секој од нас има своја улога
во градењето на силна и стабилна иднина. Секој од нас носи одговорност да инвестира во својата
заедница, преку одвојување време, енергија или ресурси. Само преку активно граѓанство можеме да
придонесеме за суштински и одржливи промени. КОМУНИТИ е одличен пример за тоа како можеме да ја искористиме технологијата за да ги приближиме локалните власти до граѓаните, да ги направиме
услугите подостапни, и да ја подобриме комуникацијата и транспарентноста,” посочи г. Марк
Елингстад, Директор на Канцеларијата за демократија и добро владеење на УСАИД. 

Оваа средба отвори можност градоначалниците заеднички да ги дефинираат следните чекори и приоди
за стратешко користење на КОМУНИТИ на локално ниво, поттикнувајќи зголемен ангажман на граѓаните, размена на информации, и заедничко справување со предизвиците.

„Заедниците се просперитетни онолку колку што се силни врските помеѓу граѓаните, општините,
граѓанските организации и бизнисите. Во седум партнерски општини, воспоставивме локални акциски
јадра кои се катализатор на здружување во заедницата. Тие ги активираат локалните ресурси на
граѓаните, компаниите и граѓанските организации и во партнерство со Општината ги вложуваат во
подобар живот на граѓаните во нивната заедница. Новите дигитални алатки, како платформата КОМУНИТИ, им овозможуваат на општините полесно да комуницираат и да им служат на
граѓаните, побрзо да ги идентификуваат потребите и да соработуваат за решенија. Овие иновации се
вредна шанса самите да бидеме двигатели на решенијата за локален одржлив развој,” истакна г-а
Никица Кусиникова, Извршна директорка на Конект.

На средбата беше потврдено дека платформата КОМУНИТИ е основната алатка која ќе овозможи секој
глас да биде слушнат, а службите на општината да можат соодветно и навремено да одговорат на
потребите на граѓаните.

Оваа активност е дел од проектот на УСАИД „Здружи се за заедницата“ спроведуван од Конект, во
партнерство со Фондација Аполонија, Индиго и ЕВН. Проектот ги спроведува активностите во општините Гевгелија, Гостивар, Охрид, Струмица, Чаир, Шуто Оризари и Битола.

Здружение КОНЕКТ

________________________________________________________________________________________ 

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.

фото Конект