Кавадарци, 28 мај 2025 (МИА) - Средношколките од Кавадарци од денеска имаат пристап до бесплатни менструални влошки во училиштата, менструалната правда започнува во Кавадарци, ова е историски ден,  информираа денеска од Комисијата за еднакви можности при оваа Општина, на светскиот ден на менструалното здравје. 

- Горди сме да објавиме дека иницијативата на Комисијата за еднакви можности на Општина Кавадарци  стана реалност.  Поставени се четири диспанзери за менструални влошки во СОУ „Добри Даскалов“ , ЗШУЦ „Ѓорче Петров“ ,СОУ „Ќиро Спанџов-Брко“. Кавадарци е градот каде што секоја девојка е важна. Во Општина Кавадарци веруваме дека менструалното здравје е право, а не привилегија, истакна Марија Камчева, координатор за еднакви можности во Општината. 

Таа изрази благодарност до Винарија Тиквеш за донацијата на финансиските средства во рамки на  Фестивалот на младо вино.  

- Овој важен чекор не би бил возможен без поддршката од Бела фарм аптеки, здружение за менструална правда и UN women Скопје.  Ова е само почеток, подвлече Камчева. 

Таа истакна дека бесплатните менструални влошки се  инвестиција во здравје, еднаквост, репродуктивно здравје и иднина

- Диспанзерите со менструални влошки, значително ќе им го олеснат животот на ученичките, овозможувајќи им лесен пристап до менструални производи и ќе им го намалат  стресот и неудобноста поврзани со менструацијата. Позитивно ќе влијаат врз образовниот процес и
ќе го олеснат финансискиот товар на девојчињата, нагласи Камчева. свд/дма/

Фото: Комисија за еднакви можности Кавадарци