Скопје, 16 мај 2024 (МИА) - Претседателката Гордана Сиљановска Давкова денеска ги примила претставниците на петтата меѓународна конференција за зелен развој, зелена инфраструктура и зелени технологии „ГРЕДИТ 2024“ којашто од денеска до 18 мај се одржува во организација на Машинскиот факултет и Универзитетот „Св. Кирил и Методиј“ во Скопје, а во рамки на БЕНА – Балканската асоцијација за животна средина, соопшти претседателскиот Кабинет.

На средбата, како што се наведува восоопштението, се разговарало за значењето на зелената агенда за регионот и пошироко како приоритет за зачувување на животната средина и здравјето на граѓаните.

Соговорниците ѝ се заблагодариле на претседателката Сиљановска Давкова за можноста да ѝ ги пренесат своите размислувања и погледи во однос на состојбите и начините за остварување на одржлив развој на мултидисциплинарен начин.

Во таа насока, било истакнато дека е значајна соработката меѓу сите чинители, носители на одлуки, експерти и активисти за придонес кон зелениот развој за позелена и поздрава иднина за сите.

Претседателката Сиљановска Давкова им посакала успешна конференција и плодна работа изразувајќи уверување дека со своите трудови и идеи ќе придонесат за зелениот развој, зелената инфраструктура и зелената технологија во регионот и севкупно во светот. дма/са/

Фото: Кабинет на претседателот