Скопје, 15 март 2023 (МИА) - Министерката за животна средина Каја Шукова најави дека справувањето со отпадот ќе биде приоритетна цел за време на нејзиниот мандат и за таа намена Министерството ќе набави 7 000 контејнери за рециклирање, што ќе бидат распоредени во сите општини на територијата на цела држава.

Министерката Шукова информира дека процесот на набавка ќе трае околу еден месец, по што набавените контејнерите ќе бидат распределени по општините.

Таа воедно информира два Министерството за животна средина и просторно планирање оваа година планира два големи заеми во вкупна вредност од 105 милиони евра за реализација на проекти, како и дека ќе продолжи спроведувањето на проектите што ги наследила од претходниот министер и кои се дел од програмата за работа на Владата.

- Едниот заем е од Европската инвестициска банка, кој ќе се однесува на помош на општините во висина од 50 милиони евра, за изградба на системи за водовод и канализација и ќе бидат опфатени сите општини во државата, појасни Шукова.

Вториот заем е од Европска банка за обнова и развој во висина од 55 милиони евра, со дополнителен грант од швајцарската Влада во висина од 9 милиони франци, наменет за набавка на опрема за изградба на трансфер станици и на централни депонии.

- Секој регион нема да има централна депонија. Сфативме дека тоа е економски неисплатливо, ќе ги групираме регионите - Југозападот и Пелагонија ги групираме со една централна депонија во Новаци, Југоистокот и Вардар ги групираме во Василево и третиот е Полог каде депонијата во Русино е во почетна фаза на стабилизација за да оперира како што треба. Сега ќе влеземе со дополнително мало кофинансирање со овој заем, за да можеме да ја направиме Русино стандардна депонија. Нејзиниот век на траење нема да биде повеќе од пет години, што значи дека во периодот додека го спроведуваме заемот ќе пристапиме и кон барање нова локација за Полог, изјави министерката.

Од програмата за отпад, на општините ќе бидат доделени контејнери за предселекција и паралелно на тоа ќе биде спроведена посериозна кампања.

- Да не биде граѓаните не се запознаени, бидејќи најчесто за тоа бевме критикувани и утврдивме дека имаме мал недостиг во тој сегмент. Граѓаните мора да бидат навремено известени за тоа што ќе се случува во нивните општини и региони, подвлече таа.

Во однос на проблеми кои се однесуваат на УНЕСКО, министерката рече дека треба уште посериозен пристап и најави средба со министерствата за култура и за транспорт и врски до крајот на месецот.

- Веќе се договоривме со министрите за култура  и за транспорт и врски да одржиме средба. Секако и до сега односот бил сериозен, но овој пат малку посериозно да видиме до каде сме и кои чекори да се преземат за се што ќе договориме соодветно да информираме. Загриженост има од сите министерства, во однос на тоа дека мора да се преземат чекори особено во делот на животна средина. Има таму одредени прашања за кои треба да се разговара и треба да се преземат акции, не само од страна на државата, туку и од единиците  на локалната самоуправа, посочи Шукова.

Засега не се планира набавка на нова мерна станица, бидејќи мониторинг системот е комплетен. Сепак доколку некоја локална самоуправа смета дека треба да биде поставена некоја мониторинг станица, тоа може да се направи со претходно издадено мислење од Министерството.

- Последниве три години вклучително и оваа, редовно одделуваме средства за одржување на мониторинг системот, за набавка на резервни делови и купување нови мониторинг станици согласно барањата на системот. Станиците ги поставуваме онаму каде е потребни согласно барањата на директивите, каде треба да се постават мониторинг станици. Ова мораме да кажам дека претходно ни беше недостиг, но конечно ги убедивме сите инволвирани страни дека редовното одржување и надградување на автоматскиот мониторинг систем е нешто што мора да го правиме сериозно и секоја година и имаме сериозни средства во буџетот за тоа, истакна министерката. свс/

Фото: МИА