Софија, 15 август 2024 (МИА/БТА) - Прекрасно би било денешниот празник Успение на Света Богородица да стане официјален и да се нареди до празниците Божиќ и Велигден, и да се почитува како што се почитува во соседните Грција и Романија. Ова денеска го изјави бугарскиот патријарх и софиски митрополит Даниил пред новинарите во Ќустендил. Тој учествуваше на денешниот официјален духовен празник на градот и отслужи патријаршиска литургија во катедралниот храм „Св. Успение Богородично“.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

„Овој празник на многу места во Бугарија е неработен ден за соодветната општина. Ако населението го празнува денес, не е далеку времето кога празникот ќе се прогласи за официјален, национален празник. Прекрасно би било,“ рече патријархот.

На патријаршиската литургија денеска учествуваа и осоговскиот митрополит Григориј и митрополит Јосиф од Република Северна Македонија. На прашањето на БТА како треба да се толкува ова заедничко служење, бугарскиот патријарх рече дека тоа е пример на единство и љубов. Денеска во Република Северна Македонија, според стариот стил, се почитува преносот на моштите на свети архиѓакон Стефан.

„Кај нив е пост, но тие дојдоа тука за да се приклучат со нас на овој радосен настан. Ова не е ли пример на љубов? Затоа велиме дека љубовта ги надминува гревовите и разликите и стои над сè, а ова е токму пример на единство и љубов во православната црква,“ рече патријарх Даниил.

Откако отслужи молебен за здравје и благосостојба на жителите и гостите на градот, патријарх Даниил ги повика верниците на смирение и вера во Бога. „Радоста не доаѓа од материјалното. Таа не зависи од материјалните услови, туку од нашиот однос кон Бога. Дали веруваме, дали се стремиме кон Него и дали се обидуваме да живееме во мир со Бога и со луѓето, од тука доаѓа душевната радост, бидејќи Бог е изворот за неа.“

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.