Роналдо: Јас не уривам рекорди, тие ме следат
- Капитенот на португалската репрезентација Кристијано Роналдо се запиша во листата стрелци во победата синоќа од 2-1 над Хрватска во Лигата на нации, што е негов 900. гол во професионалната фудбалска кариера.
![Роналдо: Јас не уривам рекорди, тие ме следат](https://mia.mk/images/20240906103251_big_730x400_80.webp )
Лисабон, 6 септември 2024 (МИА) – Капитенот на португалската репрезентација Кристијано Роналдо се запиша во листата стрелци во победата синоќа од 2-1 над Хрватска во Лигата на нации, што е негов 900. гол во професионалната фудбалска кариера.
Триесетидеветгодишниот напаѓач бурно го прослави јубилејниот гол што го постигна во 34. минута за водство од 2-0.
„Тоа беше емоција“, изјави Роналдо по натпреварот на „Стадионот на светлината“ во Лисабон.
„Се чини дека бројката од 900 гола е само пресвртница, но само јас и луѓето околу мене знаеме колку е тешко да се работи секој ден за да бидеш физички и психички способен да ја достигнеш таа бројка“, додаде португалската ѕвезда.
Фудбалерот на саудиски Ал-Наср и поранешен играч на Реал Мадрид, Јувентус, Манчестер Јунајтед и Спортинг истакна дека долго време сакал да стигне до таа бројка на голови.
„Знаев дека ќе го постигнам тоа бидејќи продолжив да играм фудбал, па нормално е тоа да се случи“, изјави Роналдо кој со Португалија освои два трофеи, Европското првенство во 2016 година и Лигата на нации во 2019 година.
„Овие други работи не ме мотивираат, но уживам во фудбалот во секое време. Рекордите доаѓаат природно. Не уривам рекорди, тие ме следат“, додаде Роналдо. ег ФОТО: Икс