Минск, 23 ноември 2023 (МИА) - Рускиот претседател Владимир Путин денеска пристигна во Минск, каде ќе се одржи самитот на Организацијата на Договорот за колективна безбедност (ОДКБ).

Агендата ќе вклучува прашања за интеракцијата меѓу членовите на организацијата, вклучително и подобрување на системот за колективна безбедност, како и меѓународни и регионални проблеми, пренесе РИА Новости.

Во пресрет на патувањето во Минск, на средба со владата, Путин ја покренал темата за формирање унифициран систем за воздушна одбрана на земјите од ОДКБ.

Тој ја изрази подготвеноста на Москва да продолжи и да ја заврши оваа работа.

Претседателот на Русија рече дека две дивизии на рускиот систем за противвоздушна одбрана С-300, односно осум фрлачи, веќе се доставени во Таџикистан.

Путин нема да има одвоени билатерални средби со лидерите на земјите од ОДКБ во Минск, но комуникацијата на маргините на самитот ќе биде задолжителна, изјави портпаролот на рускиот претседател Дмитриј Песков.

Се очекува на средбата да присуствуваат сите лидери на земјите од асоцијацијата, освен премиерот на Ерменија, Никола Пашинјан. Кремљ изрази жалење за неговото одбивање да дојде во Минск.

„Истовремено, Москва очекува Ереван да продолжи да работи во рамките на ОДКБ“, додаде Песков.

Организацијата на Договорот за колективна безбедност (ОДКБ) вклучува шест земји: Русија, Ерменија, Белорусија, Казахстан, Киргистан и Таџикистан. рп/

Фото: МИА архива