Москва, 24 март 2025 (МИА) - Судењето на поранешниот заменик-министер за одбрана на Русија започна денеска во Москва во првиот од серијата случаи што ја сигнализираат желбата на претседателот Владимир Путин да ја искорени корупцијата во вооружените сили.

Тимур Иванов беше уапсен во април минатата година под сомнение за примање поткуп. Во октомври, истражителите додадоа нови обвиненија за проневера на повеќе од 3,2 милијарди рубљи (38,3 милиони долари). Иванов ги негира обвиненијата.

Додека водеше војна во Украина која трае веќе четири години, Путин се обидува да го елиминира лошото управување и проневерата од се поголемиот руски буџет за одбрана. Најмалку десетина луѓе беа уапсени минатата година во најголемиот бран скандал што го погоди воениот естаблишмент во последните години.

Иванов, кој беше заменик министер од 2016 година, беше задолжен за управување со имот, домување, градежништво и хипотеки во Министерството за одбрана. Тој долго време беше предмет на новинарски истражувања.

Антикорупциската фондација на починатиот опозициски лидер Алексеј Навални тврдеше дека Иванов и неговото семејство живееле луксузен живот, имале јахти, хеликоптери, ја посетиле француската ривиера, купиле дијаманти и поседувале замок од 19 век во Москва.

Магазинот „Форбс“ го вброи Иванов меѓу најбогатите мажи во руските безбедносни структури. рп/

Фото: ЕПА