Штип, 18 декември 2024 (МИА) - Во тек се активностите за нанесување на прв асфалтен слој на улицата „Христијан Карпош“ во населба Леваци во Штип. Градоначалникот на Општина Штип, Иван Јорданов на денешната прес-конференција рече дека освен оваа улица во населба Леваци предвидено е да бидат реконструирани повеќе улици, со што ќе се одговори на барањата на граѓаните.

-Овде се работи на улица „Христијан Карпош“. Претходно се работеше на тротоарските површини и промена на земјиниот слој, кој беше оштетен. Денес по завршувањето на активностите за нанесување на прв асфалтен слој доколку не послужат временски прилики во деновите кои следат ќе биде нанесен и вотриот асфалтен слој. Во населба Леваци предвидено е комплетно да се реконструираат и улиците „АСНОМ“, „Коле Неделовски“ и други, изјави Јорданов.

За улицата „Христијан Карпош“ се издвоени околу 3,5 милиони денари пари од Буџетот на Општина Штип. На ваков начин парите на граѓаните се враќаат назад кај нив, преку проекти и инвестиции.

-Вкупната инвестиција која е одвоена за оваа делница е 3,5 милиони денари од Буџетот на Општина Штип, а вкупната инвестиција за улиците кои во наредниот период ќе бидат реконстуирани е нешто околу еден милион евра, додава Јорданов.

Тој најави во наредниот период ќе продолжи реконструкцијата и  инвестирањето во сите населби. вдј/сст/

Фото: МИА