Берум, 27 јануари 2025 (МИА) - Португалија, Бразил, Хрватска и Египет го комплетираа четвртфиналето на Светското првенство во ракомет за мажи.

Иберијците продолжија со импресивниот настап по убедливата победа од 46:28 (22:17) над аутсајдерот Чиле во последниот натпревар од групата 3 од главната фаза на натпреварувањето и завршија на првото место со 9 бода.

Така Португалија за првпат во својата историја ќе игра во четвртфинале на едно Светско првенство, каде противник на избраниците на Пауло Фидалго ќе биде Германија.

Јужноамериканскиот првак Бразил се зацврсти на второто место со 8 бода по победата над Шпанија со 26:25 (14:13). Ла Роха, бронзена од претходниот Мундијал, заврши на петтото место во групата со 3 бода и е елиминирана од борбата за почести.

Норвешка го доби скандинавското дерби против Шведска со 29:24 (16:11), но тоа беше мала утеха за домаќините, кои останаа третопласирани во групата со 6 бода и завршија десетти во конечниот пласман.

Во групата 4, Хрватска заврши на првото место со 8 бода по победата во последното коло над Словенија со 29:26 (15:15). Со иста бодовна предност, африканскиот шампион Египет остана втор, откако ги совлада Зеленортски Острови со 31:24 (14:13) во последниот натпревар од главната фаза.

Исланд исто така собра 8 бода по победата од 30:21 (15:10) над Аргентина, но заврши на третото место во групата поради послаб дополнителен учинок и беше елиминиран.

Двојки за четвртфинале:

Франција - Египет
Хрватска - Унгарија
Данска - Бразил
Португалија - Германија. дс

Фото: Архива