Рио де Жанеиро, 22 октомври 2024 (МИА) - Поранешниот перуански претседател Алехандро Толедо вчера беше осуден на 20 години и шест месеци затвор за примање мито во врска со корупцискиот скандал во кој е вмешан бразилскиот градежен гигант „Одебрехт“.

Судот во Лима утврди дека Толедо, кој управуваше со Перу од 2001 до 2006 година, прифатил мито од 35 милиони долари во замена за договор за изградба на делот Меѓуокеански автопат кој го поврзува Рио де Жаниеро со Лима.

Притоа 78-годишникот и нанел финансиска штета на државата, пресуди судот. Случајот, познат како афера „Одебрехт“, се смета за најголемиот корупциски скандал во Латинска Америка.

Перу имаше издадено налог за апсење на Толедо во 2017 година и побара негова екстрадиција од Соединетите држави, каде што побегна откако ја напушти функцијата. Тој беше приведен во САД во 2019 година и следеше долготраен правен процес. Минатата година Толедо им се предаде на американските власти и беше екстрадиран во Перу.

Толедо ги отфрли обвинувањата и рече дека е жртва на политички прогон.

Американското Министерство за правда соопшти дека градежниот гигант, основан од германски имигранти, платил речиси 800 милиони долари мито на поединци во 12 земји.

Градежните проекти често завршуваа со експоненцијално повеќе од планираното. На пример, делот од автопатот Меѓуокеански во Перу на крајот чини 2,1 милијарда долари наместо планираните 850 милиони долари. мс/

фото: ЕПА