Папа Франциск: Црквата е отворена за сите, вклучувајќи и ЛГБТ, но под сопствени правила
- Папата Франциск истакна дека Католичката црква е отворена за сите, вклучително и за ЛГБТ заедницата и дека има должност да ги придружува на патот на духовноста, но во рамките на своите правила.
![Папа Франциск: Црквата е отворена за сите, вклучувајќи и ЛГБТ, но под сопствени правила](https://mia.mk/images/20230807074451_big_730x400_77.webp )
Рим, 7 август 2023 (МИА) - Папата Франциск истакна дека Католичката црква е отворена за сите, вклучително и за ЛГБТ заедницата и дека има должност да ги придружува на патот на духовноста, но во рамките на своите правила.
Франциск. зборувајќи за новинарите во авионот на враќање во Рим од Португалија, исто така рече дека неговото здравје е добро по операцијата на абдоминална хернија во јуни.
Враќајќи се од фестивалот на католичкиот Светски ден на младите во Португалија, 86-годишниот папа се појави во добра форма додека одговараше на прашања околу половина час на неговата вообичаена прес-конференција по патувањето.
Еден новинар го потсети дека за време на патувањето рекол дека црквата е отворена за сите и праша дали не е неконзистентно што некои, како жените и хомосексуалците, немаат исти права и не можат да примат некои сакраменти. Ова беше очигледна референца на фактот дека на жените не им е дозволено да станат свештеници преку сакраментот од светиот ред и дека на истополовите парови не им е дозволено да стапат во брак, што е исто така сакрамент.
- Црквата е отворена за секого, но има закони кои го регулираат животот внатре во црквата, рече тој. - Според законите, не можам да учествувам во (некои) сакраменти. Тоа не значи дека таа е затворена. Секој во црквата се среќава со Бога на свој начин, рече папата. Тој потенцираше дека црковните службеници мора да ги следат сите луѓе, вклучително и оние кои не ги почитуваат правилата, со трпение и со мајчинска љубов. Црквата учи дека жените не можат да станат свештеници затоа што Исус избрал само мажи за свои апостоли. Исто така, не дозволува истополови бракови или дури и благослови за истополовите парови, но Франциск го поддржува граѓанското законодавство кое им дава права на истополовите парови во области како што се пензиите, здравственото осигурување и наследството. ссм/
фото: ЕПА