• петок, 17 мај 2024

Одбележување на Денот на Командата за обука и доктрини

Одбележување на Денот на Командата за обука и доктрини

Скопје, 15 април 2024 (МИА) - Командата за обука и доктрини (КОД) денеска во касарната „Алексо Демниевски Бауман” во Велес, со воена свеченост ќе го одбележи денот на единицата. На свеченоста ќе присуствуваат министерката за одбрана Славјанка Петровска, началникот на Генералштабот, генерал-потполковник Васко Ѓурчиновски, генерали од Армијата, државниот секретар, Владимир Анчев, претставници од Кабинетот на Претседателот, воени раководители од Генералштабот и Министерството за одбрана и претставници на локалната самоуправа и организациите со кои соработува единицата.

Пред припадниците на Командата ќе се обратат министерката Петровска и командантот на КОД, полковник Васко Коколански, по што ќе бидат соопштени стимулативни мерки на припадници од КОД за постигнатите резултати во работењето.

Присутните ќе имаат можност да проследат и показна вежба со службени кучиња од Центарот за одгледување и дресура, а ќе бидат изложени и дел од вооружувањето и опремата и други програмски содржини.

Командата за обука и доктрини го одбележува 15 април како датум кога во редовите на Армијата почнаа да пристигнуваат првите регрути на отслужување на воениот рок по што почна пополнувањето на армиските единици и целосното функционирање на Армијата. мч/вг/

фото: МИА архива

Остани поврзан