Париз, 15 април 2025 (МИА) - Францускиот министер за правда Жералд Дарманин денеска потврди дека во текот на ноќта биле извршени напади врз неколку француски затвори и рече дека ќе отпатува во Тулон, каде се наоѓа еден од нападнатите затвори.

„Имаше обиди за заплашување на персоналот во неколку затвори, од подметнување оган и палење возила до пукање со автоматско оружје“, напиша Дарманин на платформата X.

„Одам во Тулон за да им дадам поддршка на службениците на овие институции. Француската Република е соочена со проблемот на трговија со дрога и презема мерки кои во голема мера ќе ги нарушат мрежите на криминалните групи“, додаде тој.

Весникот „Ле Паризиен“ (Le Parisien) пишува дека на неколку затворски паркинзи биле запалени возила, а цел на пукотници од автоматско оружје бил и затворот во Тулон.

Весниците пишуваат дека цел на криминалците биле затворските објекти во Тулон, Екс-ан-Прованс и Марсеј, Валенс и Ним, Лујнес, Вилпент и Нантер.сд/

фото: ЕПА