Скопје, 23 јануари 2024 (МИА) - Во Стразбур се одржува редовната зимска сесија на Парламентарното собрание на Советот на Европа на која потпретседател на ВМРО-ДПМНЕ, Александар Николоски  е  реизбран за потпретседател на групата на Европската Народна Партија во Советот на Европа.

Како што соопшти ВМРО-ДПМНЕ, Николоски оваа позиција ја извршуваше  и во изминатите две години, а и денес ја добил поддршката од членовите на Европската Народна Партија, што значи дека и во  следните две години ќе биде потпретседател на Европската Народна Партија во Советот на Европа.

-Тоа е и огромна чест и огромна привилегија, имајќи предвид дека се работи  за најголемото политичко семејство во Европа, кое што има пратеници и во Советот на Европа и во Европскиот Парламент. Најголем дел од претседателите и премиерите на замјите членки на Европската  Унија доаѓаат токму од Европската Народна Партија. Исто така и претседателката на Европската Комисија доаѓа од Европската Народна Партија, потенцира Николоски.

Воедно додава дека тоа е една потврда и поддршка и за земјава, како и за неговата политичка партија ВМРО-ДПМНЕ, која што е член на Евопската Народна Партија.

- Во следните две години ќе продолжам да се залагам за заштита на човековите права, на малцинските и на јазичните права на сите оние на кои што им се загрозени, особено на Македонците кои што живеат во Бугарија, во Грција и во Албанија кои што немаат признати малцински јазични права. Исто така, ќе продолжам  да се залагам за интересите на Македонија и ќе се обидам оваа позиција да ја искористам  најдобро можно, најавува Николоски.

Тој иформира  дека она што преставува дополнителна привилегија и чест е што, покрај него, избрани се уште пет други политичари на оваа позиција како потпретседатели на Европската Народна Партија во Советот на Европа. Тоа се политичари од Германија, Италија, Норвешка и Полска.

- Тоа  значи е еден навистина престижен избор кој што само покажува што треба да правиме во следниот период и на каде треба да се движи политиката и на мојата политичка партија ВМРО-ДПМНЕ, но и на Македонија, истакна Николоски. ад/дма/

Фото: ВМРО-ДПМНЕ