Прв базар на мали еколошки бизниси
- Во организација на Здружението за еколошка едукација и одржливо живеење Yes for Less и Јуроп хаус Скопје, денеска во „Бистро Комедија“ ќе се одржи првиот базар на мали еколошки бизниси во Република Северна Македонија.
Скопје, 21 октомври 2023 (МИА) - Во организација на Здружението за еколошка едукација и одржливо живеење „Yes for Less“ и „Јуроп хаус“ Скопје, денеска во „Бистро Комедија“ ќе се одржи првиот базар на мали еколошки бизниси.
Целта на настанот е запознавање со овие бизниси кои секојдневно придонесуваат кон одржливиот развој на државата, промоција на еколошките алтернативи што се нудат во замена за стандардните производи кои секојдневно се користат и подигнување на еколошката свест и позитивното влијание што овие бизниси го имаат.
-Ова не е само обичен базар, туку и можност за дружба и запознавање со еко заедницата која, освен поединци, вклучува и над 30 бизниси, од кои 20-тина ќе бидат присутни на базарот. Биоразградливи хулахопки, накит од рециклирана пластика, облека од втора рака и природни материјали, житни цевки за пијалаци, освежувачи за простории од кора од портокал се само дел од македонските иновативни и еколошки производи кои ќе може да ги најдете на базарот, велат од Здружението за еколошка едукација и одржливо живеење „Yes for Less“ - Скопје.
Освен базарот, за сопствениците на бизнисите ќе биде одржана и работилница на тема „Еколошки бизниси: комуникација и пристап до потрошувачите". Предавач и водич ќе биде Игор Мишевски - претприемач, инвеститор, експерт за развој на пазарни системи и основач на Импакт Фондација, а целта на работилницата е сопствениците да ги подобрат продажните вештини со што би можеле да допрат до што повеќе луѓе. дма/бак/
Фото: Здружение за еколошка едукација и одржливо живеење Yes for Less - Скопје