МИА Општински пул

8 февруари 2023

Скопје - Казнети се 141 возач во текот на вчерашниот ден во спроведената акциска контрола на територијата на Република Северна Македонија за санкционирање на возила кои се движат со брзина поголема од дозволената.

Од нив, три возила се движеле со над 50 километри на час повеќе од дозволената брзина. Притоа, информираа денеска од МВР, 80 возила ја пречекориле брзината во населено место, а 61 надвор од населено место.

Скопје - На територија на Град Скопје вчера се изречени вкупно 127 мерки, меѓу кои за користење мобилен телефон при возење 14 санкции, пет мерки за возење без возачка дозвола, пет санкции за технички неисправни и нерегистрирани возила.

Изречени се три санкции за минување на затворен сигнал (црвено светло), три мерки за возење под дејство на алкохол...

Скопје - Советот на Општина Гази Баба по иницијатива на градоначалникот Бобан Стефковски на седница денеска донесе одлука за определување 500 000 денари финансиска помош за настраданото население во Турција и Сирија.

Градоначалникот Стефковски на својот официјален фејсбук профил меѓу другото и се заблагодари на претседателката на Советот Дијана Илиевска за итното прифаќање на неговото барање и свикување на седницата за краток рок.

Скопје - Граѓани од населбата Автокоманда денеска повторно излегоа на улица за да изразат незадоволство од новиот начин на снадбување со топлинска енергија. Негодуваат дека не биле навремено известени за промените на договорите, ниту пак им бил даден избор да одлучат дали сакаат да се греат под новите услови.

Жителите на Автокоманда велат дека немаат греење по 22 часот, а неретко парното наместо во 6 часот им се вклучува во 7 часот наутро.

Битола - Книгата „Брливо шилеже“ во издаваштво на Пелагонски културно-научни средби-Новаци, на авторот Божин Андоновски содржи 23 раскази или искази на луѓе, како и сеќавања на самиот автор од кои се откриваат времиња и настани преку кои Андоновски прави конструкција и реконструкција на историјатот на еден регион.

На синоќешниот промотивен настан во Битола, рецензентот, универзитетскиот професор Златко Жоглев истакна дека авторот Божин Андоновски во расказите внесува многу луцидни и креативни коментари поврзани со народната традиција и верувања кои всушност служат како инспирација за повеќе раскази од книгата.

Тетово - Судија во претходна постапка при Основен суд Тетово определи мерка притвор за 33-годишник од тетовска Голема Речица кој во понеделникот беше приведен поради пријава за изнуда на пари.

Според информаците од тетовската полиција определен е осум дневен притвор за осомничениот З. Д. (33) од Голема Речица кој ќе биде спроведен во КПУ Затвор Скопје.

Тетово - Денеска и утре Попова Шапка е домаќин на државното првенство во сноуборд на Македонија и „ФИС Сноуборд куп 2023", во организација на Скијачката федерација на Македонија, Меѓународната скијачка федерација (ФИС) и сноуборд клубот XMKD. (ХМКД).

На првенството, покрај домашните претставници учествуваат повеќе од 50 натпреварувачи од повеќе земји од Србија, Бугарија, Грција и Романија.

Дебар – Поради состојбата после катастрофалниот земјотрес што се случи во Турција и во Сирија, по барање на градоначалникот Медат Куртовски, Советот на општина Маврово и Ростуше попладнево одржа вонредна седница.

На седницата, по предлог на Куртовски, донесена е едногласно одлука да се додели финансиска помош во износ од 500.000 денари за настраданите во подрачјата погодени од земјотресот.

Делчево - Во Делчево во тек е пријавувањето за учество на планинарскиот марш до планината Голак, што ќе се одржи в недела по повод одбележувањето на годишнината од Февруарскиот поход. Организатори на маршот се Планинарскиот спортски клуб „Голак“ и Општина Делчево, кои упатија отворена покана до сите планинари да земат учество во истиот.

- Планинарскиот марш ќе се одвива по зимската патека, со почетна точка од паркингот пред домот на културата АСНОМ во центарот на Делчево. потоа продолжуваме преку населба Расадник, Манастир Св.Богородица Балаклија , спортски терени со крајна дестинација Спомен плоча на планина Голак, информираше Љупчо Чучуковски, претседател на ПСК „Голак“.

Струмица - Струмичкиот театар „Антон Панов“ сите пари собрани од продадените билети за месец февруари ќе ги донира за помош на настраданото население погодено од катастрофалните земјотреси во Турција и Сирија.

Ова го соопшти директорката на НУЦК „Антон Панов“, Танкица Стојанова, која упати апел да публиката да дојде во театарот и на тој начин да ја искаже својата хуманост.

Кавадарци - Советот на Општина Кавадарци вечерва на вонредна седница одобри 900 илјади денари пари од општинскиот буџет, за настраданите од земјотресите во Турција и во Сирија.

Општинските советници со едноминутно молчење им оддадоа почит на загинатите во земјотресот.