Софија, 28 јануари 2026 (МИА/БТА) - Јапонската компанија „Мејџи“ ќе започне со производство на нов млечен производ со бугарски квасец по лиценца на „Ел Би Булгарикум“. Ова беше истакнато на средбата во Софија меѓу претставници на двете компании, на која се разговараше за успешната лиценцна дејност на „Ел Би“ и „Мејџи“ (Meiji), соопштија од државното млечно претпријатие.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Во разговорите учествуваа извршниот директор на „Ел Би Булгарикум“, Николај Стојнев, раководителката на Научно-истражувачкиот центар, вонр. проф. д-р Светлана Минкова, како и други претставници на компанијата. Од јапонска страна учествуваа Даиши Алаџи, Јусуке Сугала и Такахиро Сакурај, дел од тимот „Кисело млеко“.

Новиот производ ќе биде млечен пијалак со атрактивно пакување, насочен главно кон младите полнолетни потрошувачи. Тој ќе биде пуштен на јапонскиот пазар во три варијанти: природно кисело млеко за пиење, кисело млеко за пиење со вкус на боровинка и кисело млеко за пиење со вкус на јагода. Производството на новиот производ започнува по опсежни истражувања за преференциите на младите потрошувачи, а неговото пуштање на пазарот ќе биде придружено со широка рекламна кампања со учество на познати личности.

Во моментов „Мејџи“ произведува кисело млеко со името на Бугарија по лиценца на „Ел Би Булгарикум“. Производот е на јапонскиот пазар повеќе од 50 години, а брендот има над 30 милиони потрошувачи. Новиот млечен производ ќе се приклучи на широката палета млечни производи произведени под брендот „Бугарија“ и ќе го носи името Meiji Bulgaria Yogurt Drink ONE SHOT.

„Новиот производ е природно продолжение на нашето успешно партнерство со ’Мејџи‘ и е доказ за заемната желба за проширување на асортиманот на производи произведени под бугарска лиценца. Среќни сме што заедно со ’Мејџи‘ продолжуваме да го зацврстуваме името на Бугарија како симбол за квалитет и здрава исхрана“, коментираше раководителката на Научниот центар, вонр. проф. Минкова.

Во декември минатата година од економското министерство соопштија дека заедничката научно-истражувачка лабораторија на „Ел Би Булгарикум“ и јапонската „Мејџи“ се очекува да биде отворена во средината на 2026 година во Софија, а нејзината главна цел ќе биде да ги проучува придобивките и да ги докажува квалитетите на традиционалното бугарско кисело млеко. Ова стана познато за време на средбата на министерот за економија и индустрија во оставка, Петар Дилов, со извршниот директор за меѓународни односи на „Мејџи“, Хидеки Морита, и делегацијата од јапонската корпорација предводена од него.

______________________________________________________________________________________________________________________________

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.