Берлин, 6 јуни 2023 (МИА) - Германскиот фудбалски стручњак Јоаким Лев изјави дека не бил контактиран од бразилската репрезентација која е во потрага по нов селектор на тимот.

- Не е точно дека ме побараа од Бразил. Немаше никакви контакти. Инаку, можам со ист интензитет да работам и со клубот и со репрезентацијата, ги цитира зборовите на Лев „Билд“

Претходно беше објавено дека 63-годишниот специјалист е лично заинтересиран да го заземе местото селектор на бразилската репрезентација.

Лев е без работа од јули 2021 година, откако ја напушти германската репрезентација, која ја водеше 15 години.

Последен селектор на бразилската репрезентација беше Тите, под чие водство „Кариоките“ стигнаа до четвртфиналето на Светското првенство 2022 година, во кое беа елиминирани од Хрватска (1:1, 2:4 на пенали). По овој пораз, Тите ја напушти функцијата. зс/

Фото: ЕПА