Скопје, 21 февруари 2023

Минатата недела, Димитар Ковачевски најави дека конечно ќе се побара меѓународен мониторинг на случаите „Монструм“, „Диво насеље“, „Малиот Алмир“ и „Алфа“.

Мониторинг над овие случаи беа дел од договорот што Алтернатива го постигна со поранешниот премиер Зоран Заев, кога тие решија да станат дел од Владата.

Пазарот кој го прави Ковачевски по секоја цена за да остане на власт, ќе вклучува и мониторинг од Европската комисија за селективни судски случаи кои се веќе завршени и има правосилни судски пресуди. Со ваквиот потег, Ковачевски не само што потврдува дека сѐ би направил да остане на власт, туку и се доведува во прашање независниот правосуден систем во Македонија, во кој доверба имаат само 7% од населението. Дополнително, ваквиот политички пазар директно го нарушува владеењето на правото, како темелна вредност која е утврдена со Уставот.

Судството како независен постулат не смее да се стави во подредена позиција на странски фактори кои ќе вршат влијание на нашето правосудство. Во Законот за кривична постапка, Законот за парнична постапка, како и други процесни закони, јасно е предвидено под кои услови може да има повторување на постапката за одреден предмет или кој суд е надлежен за укинување на одредена пресуда.

Политичката манипулација со судски предмети, која ја започна Заев со случајот Смилковско езеро, ја продолжува Ковачевски во надградена и проширена верзија. Јасно е дека во услови кога владиното мнозинство е нестабилно, Ковачевски е подготвен да ги прифати сите штетни барања, само за да остане на власт.

Политичка партија Левица

—————————————————————————————————————————

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.